ՄԱԿ-ի առաքելության գործունեության դադարեցումը Սիրիայում, որի մասին շաբաթ օրը հայտարարել էր Սիրիայում ՄԱԿ-ի դիտորդների առաքելության ղեկավար գեներալ Ռոբերտ Մուդը, ոչ մի կերպ չի անդրադառնա մերձավորարևելյան այս երկրում տիրող իրավիճակի վրա, որտեղ մեկ տարուց ավելի է` շարունակվում են զինված բախումները իշխանության և ընդդիմության միջև: Նման տեսակետ է հայտնել Մերձավոր Արևելք ինստիտուտի նախագահ Եվգենի Սատանովսկին:
«Ոչինչ տեղի չի ունենա: Սիրիայում քաղաքացիական պատերազմ է, ՄԱԿ-ի առաքելությունը քաղաքացիական պատերազմի ժամանակ ձեզ օգնում է այնպես, ինչպես մոտավորապես պասատները` ծովափնյա հանգիստ կազմակերպելու ժամանակ»,- ասել է Սատանովսկին:
Նրա խոսքով` Սիրիայում ՄԱԿ-ի դիտորդների գտնվելը ոչ մի կերպ չի ազդել սիրիական ճգնաժամի ընթացքի վրա, այդ պատճառով առաքելության դադարեցումը չի վատացնի և չի լավացնի իրավիճակը:
Փորձագետի կարծիքով` ո’չ ՄԱԿ-ի դիտորդների աշխատանքների դադարեցումը, ո’չ Քոֆի Անանի ծրագրի տապալման ընդունումը հնարավոր չեն դարձնի Սիրիայում լիբիական սցենարի կրկնությունը: Նա նշել է, որ ռազմական ներխուժումը չեն ողջունում ո’չ Չինաստանը, ո’չ Ռուսաստանը:
Սատանովսկին նաև ընդգծել է, որ Սիրիա ռազմական ներխուժումը միջազգային հասարակության վրա շատ թանկ կնստի: Այդ պատճառով փորձագետը կարծում է, որ ռազմական ներխուժման հնարավորությունը քիչ հավանական է:
Հիշեցնենք, որ այսօր ավելի վաղ Սիրիայում ՄԱԿ-ի առաքելության ղեկավար գեներալ Ռոբերտ Մուդը հայտարարել էր, որ դադարեցնում է աշխատանքները՝ երկրում բռնության ուժեղացման պատճառով:
