ԱՄՆ-ում Iphone-ների համար հատուկ հավելված (application) է ստեղծվել, որը նվիրված է Մեծ Եղեռնի ճանաչմանը: Հիմնադիրը 30-ամյա Ալեքս Նիսանյանն է:
Հավելվածն արդեն պատրաստ է և, Նիսանյանի խոսքով, ներկայումս հասարակական աջակցության փուլում է: Այն արդեն տեղակայված է հայտնի կայքերից մեկում գումար հավաքագրելու համար: Բավարար գումար ունենալուց հետո հավելվածը կդառնա անվճար:
Հավելվածը սկսվում է Ծիծեռնակաբերդի հուշահամալիրի անմար կրակի կադրով` դուդուկի հնչյունների ներքո: Կա նաև պատմական էջ, որտեղ ներկայացվում է 1915-1923 թթ. իրականացված Հայոց ցեղասպանության պատմությունն ու այն երկրների ցանկը, որոնք պաշտոնապես ճանաչել են Մեծ Եղեռնը, իսկ վերջին լուրերի հատվածում կարելի է ծանոթանալ ճանաչման գործընթացում տեղի ունեցած վերջին իրադարձություններին,- տեղեկացնում է «Ասպարեզը»:
Նիսանյանի խոսքով, հավելվածը շատ անհրաժեշտ է և հնարավորություն կտա հասարակությանն ավելի ակտիվորեն ներգրավվել ճանաչման գործընթացում: Նա ցանկանում է, որ հավելվածը դառնա բաց և օգուտ տա ողջ հայ համայնքին:
