Ռուսաստանում, մասնավորապես` Եկատերինբուրգում, փետրվարի 1-ից մեկնարկում են Ռուսաստանի առաջին նախագահ Բորիս Ելցինի 80-ամյակին նվիրված միջոցառումներ:
«Առաջին լրատվական»-ը ՀՀ 1992-96 թ.թ. արտգործնախարար Վահան Փափազյանից հետաքրքրվեց, թե ինչպիսի հարաբերություններ էին ստեղծվել Հայաստանի և Ռուսաստանի միջև Բորիս Ելցինի պաշտոնավարման օրոք:
«Բորիս Ելցինն էությամբ ժողովրդավար անձնավորություն էր և նրա անձնական հարաբերությունները Հայաստանի իշխանությունների, մասնավորապես` Լևոն Տեր-Պետրոսյանի հետ շատ մտերմիկ էին: Անցյալ դարի 90-ականների առաջին կեսին Հայաստանում ձևավորվել էր ժողովրդավարական համակարգ, և այդ առումով տարընթերցումների և չհասկացվածության առիթ երբեք չի եղել:
Հատկանշական է, որ այդ ժամանակ թե՛ Հայաստանում , թե՛ Ռուսաստանում ձևավորվել էին նոր կառավարություններ: Եթե ինչ-ինչ խնդիրներ էլ ծագում էին իշխանության ցածր օղակներում, ապա Ելցինը և Տեր-Պետրոսյանը կարողանում էին կարճ ժամանակում հարթել դրանք և լուծումներ գտնել»,- հիշում է Վահան Փափազյանը:
ՀՀ նախկին արտգործնախարարը «Առաջին լրատվական»-ի հետ զրույցում ասաց նաև, որ Բորիս Ելցինի պաշտոնավարման օրոք Ռուսաստանի և Հայաստանի միջև հաստատվել էին գործընկերային հարաբերություններ:
«Այդ հարաբերությունները հաստատվել էին նաև ներքևի օղակներում`երկու երկրների վարչապետների, արտգործնախարարների, պաշտպանության նախարարների միջև»,- ասաց Վահան Փափազյանը:
Նա նշեց նաև, որ Բորիս Ելցինն ընդգծված հարգալից վերաբերմունք ուներ ինչպես ՀՀ իշխանությունների, այնպես էլ` հայ ժողովրդի նկատմամբ:
«Բորիս Ելցինը Ռուսաստանի պատմության ամենանշանավոր քաղաքական դեմքերից մեկն է և պատմության մեջ կմնա որպես այդպիսին: Նրա արժանիքները դեռևս ամբողջությամբ չեն գիտակցվել»,-«Առաջին լրատվական»-ի հետ զրույցում նշեց Վահան Փափազյանը:
