Ավստրալիայի Նոր Հարավային Ուելս նահանգի իշխանությունները միջոցներ են ձեռնարկել բայքերների ավազակախմբերի դեմ պայքարելու համար:
Մասնավորապես նրանց արգելել են կրել իրենց խմբավորումների «գույները» Սիդնեյի կենտրոնական շրջանի 58 փաբերում, գիշերային ակումբներում և ռեստորաններում: Օրենքն ուժի մեջ կմտնի ապրիլի 27-ից:
«Բայքերական գույներ կրելը քեզ սուպերհերոս չի դարձնում և չի պաշտպանում օրենքի ուժից»,- մեջբերում է Sky News-ը Նոր Հարավային Ուելսի վարչապետ Բարի Օ’Ֆարելի խոսքերը:
Մայիսին նահանգի իշխանությունները հույս ունեն բայքերներին նաև արգելել տատու-սրահներ ունենալ՝ թույլ տալով իշխանություններին փակել արդեն գոյություն ունեցող հաստատությունները: Ոստիկաններին նաև իրավունք կտրվի թմրանյութ փնտրելու նպատակով առանց օրդերի մուտք գործել տատու-սրահեր: Վարչապետի խոսքերով՝ 23 խմբավորումներ նման հաստատություններն օգտագործում են որպես իրենց հանցավոր գործունեությունը թաքցնելու վայր:
Այս պահին բայքերներին արգելված է աշխատել մի շարք բնագավառներում:
Հարավային Ուելսի իշխանությունները նոր արգելքների մասին հայտարարեցին այն բանից հետո, երբ Սիդնեյում երկու խմբերի միջև փոխհրաձգություն գրանցվեց: Ընդհանուր առմամբ, 2012թ. հունվարին քաղաքում բայքերական խմբավորումների միջև տեղի է ունեցել 50 միջադեպ:
Դեռ 2009թ. նման միջոցառումներ էր առաջարկել նախորդ կառավարությունը՝ Սիդնեյի օդանավակայանում երկու խմբավորումների միջև տեղի ունեցած բախումից հետո, սակայն Բարձրագույն դատարանը դրանք հակասահմանադրական ճանաչեց:
