«Պետական բյուջեն ծառայեցվում է կուսակցական շահերին»,- այսօր կայացած խորհրդակցության ժամանակ ասաց «Ժառանգություն» կուսակցության նախագահ Րաֆֆի Հովհաննիսյանը:
«Կուսակցականացված են անգամ պետական խորհրդանիշները, ինչն անթույլատրելի է: Բոլոր կուսակցությունները պետք է ստորադասվեն պետությանը: Ինչո՞ւ պետք է երկրի նախագահը կամ մեկ այլ պետական պաշտոնյա զբաղեցնի այս կամ այն բուհի հոգաբարձուների խորհրդի նախագահի պաշտոնը: Սա շահի ցայտուն բախում է, որը պետք է բացառել»,- ասաց նա:
Հովհաննիսյանն ընդգծեց, որ մայիսի 7-ի բացվող արշալույսով ՀՀ քաղաքացին պետք է իրեն երկրի տեր զգա:
Խորհրդակցության մյուս բանախոս, քաղաքագետ Հմայակ Հովհաննիսյանն իր հերթին ավելացրեց, որ Քաղաքագետների միության հավաստի տվյալներով՝ առաջիկա խորհրդարանական ընտրություններին մեռյալ հոգիների ցուցակագրման հաշվին ընտրացուցակներում, 2008-ի համեմատ, ընտրողների թիվն ավելանալու է շուրջ 170 հազարով: «Ստացվում է` այն տարիներին բեյբի-բում է եղել, և հիմա ընտրողների թիվն աննախադեպ աճ է ապրել»,- նշեց նա:
