Հարավային Օսիայի նախագահի թեկնածուների շտաբները ընտրողների ձայների անկախ հաշվարկ են իրականացնում`տեղամասերի իրենց դիտորդներից ստանալով նախնական տվյալներ:
Հանրապետության ՊԱԿ-ի նախկին ղեկավար Լեոնիդ Թաբիլովի շտաբում վստահեցնում են, որ հանրապետության 15 ընտրատեղամասերում իրենց թեկնածուն առաջատարն է`ավելի քան 45%: Թաբիլովի առաջատարության մասին են վկայում նաև ԿԸՀ հաշվարկները:
Շտաբի ներկայացուցիչը ИТАР-ТАСС-ին հայտնել է, որ երկրորդ տեղում է ՌԴ-ում Հարավային Օսիայի դեսպան Դմիտրի Մեդոևը: Մոտավորապես նման պատկեր է ներկայացնում նաև Մեդոևի շտաբը:
Նշենք, որ այս դեպքում տեղի կունենա ընտրությունների երկրորդ փուլ:
Ընտրությունները Հարավային Օսիայում ավարտվել են: Ընտրություններին մասնակցել է ընտրողների ավելի քան 65%-ը:
ԿԸՀ-ն տեղեկացնում է, որ ձայների հաշվարկը տեղի է ունենում բոլոր թեկնածուների ներկայացուցիչների հսկողության ներքո:
2011 թվականի նոյեմբերի 27-ին տեղի ունեցած նախորդ ընտրությունների արդյունքները Հարավային Օսիայի Գերագույն դատարանը անվավեր էր ճանաչել տեղի ունեցած խախտումների պատճառով: Այդ ժամանակ նախագահ էր ընտրվել ընդդիմության թեկնածու Ալլա Ջիոևան:
Ջիոևան այսօր հայտարարել է, որ չի գնա ընտրության: «Ես չեմ գնա ընտրություններին, քանի որ դրանում իմաստ չեմ տեսնում և չեմ հավատում դրանց անաչառությանը»,- ասել է ընդդիմադիրը:
