Facebook-ն արդեն գիտի, թե ովքեր են մեր ընկերները, ինչ ենք մենք սիրում լսել և ինչ տեսք ունենք օրվա տարբեր պահերի:
Այժմ օգտատերերի սիրային գաղտնիքները նույնպես պատկանում են ոսցիալական ցանցին: Ընկերության հետազոտողներն ուսումնասիրել են օգտատերերի տվյալները` պարզելու համար, թե որոնք են սիրային հարաբերությունների համար ամենալավ և ամենավատ եղանակներն ու ամիսները: Հետազոտությունն իրականացնելու համար նրանք հետևել են, թե ինչ հաճախականությամբ է օգտատերերի սիրային կարգավիճակը կայքում փոխվում single (միայնակ) կամ divorced (ամուսնալուծված)-ից in a relationship (հարաբերության մեջ) կամ engaged (նշանված)-ի:
Ուսումնասիրելով նաև հակառակ երևույթը` հետազոտողները կարողացել են պարզել, որ սիրային հարաբերությունների համար հունիսն ամենավատ ամիսն է, քանի որ հենց հունիսին են մեծ թվով մարդիկ իրենց սիրելիներից բաժանվում և սոցիալական ցանցի միջոցով այդ մասին տեղեկացնում իրենց ընկերներին: Ընդհանուր առմամբ, ամառը կոտրված սրտերի եղանակն է, քանի որ ըստ հետազոտության տվյալների` հատկապես մայիսից օգոստոս ամիսների ընթացքում է ավելանում այն մարդկանց թիվը, ովքեր կայքում իրենց սիրային կարգավիճակը փոխում են` այն դարձնելով single (միայնակ):
Ի տարբերություն սրա, սիրային հարաբերությունների համար լավագույն եղանակը ձմեռն է` հատկապես Սուրբ Ծնունդի և Սուրբ Վալենտինի օրերի շնորհիվ:
Կատարված հետազոտության համար օգտագործվել են 2010 և 2011 թվականների տվյալները:
Հետազոտողները, իհարկե, հիշեցնում են, որ մարդիկ միշտ չէ, որ անկեղծ են իրենց հարաբերությունների մասին սոցիալական ցանցում տեղեկացնելիս:
