ԱՄՆ-ի Մերիլենդ նահանգում ծնողներն իրենց աղջկան մոռացել են ռեստորանում: Ըստ ИТАР-ТАСС-ի՝ ծնողները Հարմոնի անունով 3 տարեկան աղջկան բերել են Chuck E. Cheese մանկական ռեստորան և մոռացել այնտեղ: Ծնողներն իրենց անփութության մասին իմացել են միայն երեկոյան լուրերի թողարկումից: Բարեբախտաբար, ամեն ինչ լավ է ավարտվել, և փոքրիկ աղջիկն արդեն իր մայրիկի հետ է:
Հարմոնիի ծնողները միասին չեն ապրում, սակայն, դատարանի որոշմամբ, համատեղ պատասխանատվություն են կրում աղջկա դաստիարակության հարցում:
Երեքշաբթի նրանք աղջկան բերել էին Chuck E. Cheese. Հարմոնին մի մանկական միջոցառման էր հրավիրված, որտեղ կային բազմաթիվ այլ հյուրեր: Սակայն տոնական միջոցառման ավարտից հետո աղջկան ոչ ոք չի վերցրել:
Այն մասին, որ ծնողներն աղջկան մոռացել են, և որ նա մնացել է մենակ, ռեստորանի աշխատակիցներն իմացել են միայն փոքրիկի ջուր խնդրելուց հետո: Քանի որ երեխան չէր կարող բացատրել, թե ինչպես գտնել իր ծնողներին, որոշվել է աղջկա լուսանկարը ցույց տալ լուրերի թողարկման ժամանակ:
Այս մտահղացումը արդյունք է տվել, և շուտով աղջկա ծնողները զանգահարել են: Ինչպես պարզվել է՝ ծնողներից յուրաքանչյուրը կարծել է, թե աղջիկը մյուսի մոտ է:
Համոզվելով, որ թյուրիմացություն է տեղի ունեցել, Երեխաների իրավունքների պաշտպանության տեղական գրասենյակը հանձնարարել է երեխային վերադարձնել մորը:
