Եվրոգոտու երկրների բանկերը Եվրոպական Կենտրոնական բանկից (ԵԿԲ) խնդրելու են երկու անգամ մեծացնել ֆինանսական օգնության չափը: Այս մասին հայտնում է The Financial Times-ը` վկայակոչելով ֆինանսա-վարկային հաստատությունների ներկայացուցիչներին: Պարբերականի տվյալների համաձայն՝ եթե ԵԿԲ-ն համաձայնի բանկերի խնդրանքին, ապա 2012 թվականի փետրվարին ֆինանսական հաստատություններին հատկացվող ֆինանսական օգնության չափը կարող է աճել մինչև տրիլիոն եվրոյի:
Եվրոպայի որոշ խոշոր բանկերի գլխավոր մենեջերները անանունության սկզբունքով պարբերականին հայտնել են, որ մտադիր են ԵԿԲ-ին խնդրել ոչ միայն կրկնապատկել, այլ անգամ եռակի մեծացնել ֆինանսական օգնության չափը: Բանկերում վստահ են, որ կարգավորիչը համաձայնելու է այս պահանջին, քանի որ հակառակ դեպքում շուկաներին անկում է սպասվում: Բացի այդ, պարբերականի տվյալների համաձայն՝ ԵԿԲ-ին վարկային արտոնություն տրամադրելու խնդրանքով են դիմելու ավելի շատ բանկեր, քան տրանշի վերջին սերիայի ժամանակ:
2011 թվականի դեկտեմբերին ԵԿԲ-ն Եվրոպայի խոշորագույն բանկերին ցածր տոկոսադրույքով 489 միլիարդ եվրո վարկային արտոնություն է տրամադրել: Վարկը տրամադրվել է երեք տարով: ԵԿԲ-ի ծրագրին մասնակցել են մոտ 500 ֆինանսական հաստատություններ: 2012 թվականի հունվարին ԵԿԲ-ի նախագահ Մարիո Դրագին հայտարարել էր, թե վստահ չէ, որ տրված վարկերը օգուտ են բերելու իրական տնտեսությանը, սակայն այլ ելք չի տեսնում:
