Կոպենհագնեից ոչ հեռու գտնվող ժամանակակից արվեստի «Արկեն» թանգարանում հունվարի 28-ին բացվել էր Դանիայի թագուհի Մարգրեթ Երկրորդի ցուցահանդեսը` նվիրված իր գահակալման 40-ամյակին: Ինչպես հաղորդվում է թանգարանի կայքում, «Գույների էությունը` Մարգրեթ Երկրորդ թագուհու արվեստ» խորագրով ցուցահանդեսը ցուցադրվելու է մինչև հուլիս:
Այս ցուցահանդեսը թագուհու գործերի ամենամեծ ցուցադրությունն էր. ներկայացված է 135 աշխատանք` ջրաներկով արված նկարներ, կոլաժներ, որոնք ստեղծվել են վերջին 35 տարիների ընթացքում:
Associated Press-ին տված հարցազրույցում Մարգրեթ Երկրորդն ասել է, որ իրեն ոգեշնչում են ինչպես դանիացի վարպետների բնանկարները, այնպես էլ «ոսկե դարի» նկարիչների գործերը: Թագուհու խոսքերով՝ նկարչության համար նա ամեն շաբաթ ժամանակ է հատկացնում, սակայն բնանկարչությամբ հիմնականում զբաղվում է սեպտեմբերից մայիս ընկած ժամանակահատվածում:
Թագուհին նշել է, թե հպարտ է, որ իր աշխատանքները ցուցադրվում են այդպիսի հանրահայտ թանգարանում: Նա նաև ասել է, որ տարեցտարի իրեն ավելի վստահ է զգում՝ որպես նկարչուհի:
Մարգրեթ Երկրորդը զբաղվում է գեղանկարչության տարբեր ուղղություններով` բնանկարչությունից մինչև գրքերի նկարազարդում:
