Եթե Ծառուկյանը չկարողանա դիմադրել Սերժ Սարգսյանի պահանջներին նրան լրջագույն վերջաբան է սպասվում:
Դեռ տարեսկզբին` ԲՀԿ 5-րդ համագումարում, այդ կուսակցության նախագահի պաշտոնում վերընտրված Գագիկ Ծառուկյանը հանկարծ հայտարարեց, որ եթե չկարողանա կատարել կուսակցության նախագահի պարտականությունը, ապա կհեռանա՝ տեղը զիջելով նոր նախագահի: Ծառուկյանն ինքն էլ շեշտեց, որ իր այդ հայտարարությունն անակնկալ հայտարարություն է: Հիմա թերևս պարզ է, թե ինչն էր դրա պատճառը: Ամենայն հավանականությամբ, Ծառուկյանը գիտակցում էր, որ գուցե երկար չկարողանա դիմադրել Սերժ Սարգսյանի պահանջներին և վերջնագրերին ու տեղի տա: Եվ իսկապես, Ծառուկյանը դրանից հետո դիմադրեց ընդամենը 5 օր և չկարողանալով հաղթահարել իր կյանքի թերևս կարևորագույն փորձությունը, հինգերորդ օրը` փետրվարի 17-ին գնաց ու ստորագրեց կոալիցիոն «ղազագիրը»:
Եթե Ծառուկյանը չկարողացավ կատարել կուսակցապետի իր պարտականությունը և համաձայնեց կուսակցությունը սպանել, նա պետք է հեռանա: Կուսակցապետի պարտականության մեջ է մտնում այն, որ նա կարողանա կուսակցության համար հնարավորինս մեծ քաղաքական հնարավորություններ և ապագա ապահովել: Մինչդեռ Ծառուկյանի` ՀՀԿ-ի հետ նույն ցուցակով գնալու որոշումը ԲՀԿ-ին ոչ թե ապագա է կապահովի, այլ ՕԵԿ-ացում: ԲՀԿ-ն վերջնակապես կվարկաբեկվի`կախվածության մեջ հայտնվելով ՀՀԿ-ից:
Այսպիսի որոշումից հետո, ժամանակի ընթացքում ԲՀԿ-ն նաև ՕԵԿ-ի նման դառնալու է ՀՀԿ-ի կցորդը, որտեղ Սերժ Սարգսյանը կտեղավորի բոլոր նրանց, ում չի ուզում ՀՀԿ-ում տեղավորել, որ իր «բյուրեղյա մաքրության» ռեֆորմիզմի վրա ստվեր չգցեն: Այսինքն՝ ինչպես ՕԵԿ-ում է խցկում զանազան խուճուճ-մուճուճների, այդպես էլ «Բարգավաճը» կլցնի տարբեր կարգի նորանոր մականունավորներով: Ահա թե ինչ ապագա կապահովի Գագիկ Ծառուկյանը կուսակցության համար: Եվ քանի դեռ ուշ չէ, քանի դեռ բանը չի հասել նրան, որ Սերժ Սարգսյանը նաև ԲՀԿ նախագահի անունը որոշի, Գագիկ Ծառուկյանն ավելի լավ է՝ ինքնակամ հեռանա, ինչպես խոսք է տվել:
Գուցե դեռևս շանս կա, որ ԲՀԿ-ն կգլխավորի այնպիսի մեկը, որը կկարողանա այդ կուսակցությունը դուրս բերել ՀՀԿ ոտքերի տակից: Շատերը, հավանաբար, նկատի կունենան Ռոբերտ Քոչարյանին: Ինչո՞ւ ոչ: Նախ՝ այդպես Քոչարյանը դուրս կգա ստվերից և կհայտնվի հասարակության աչքի առաջ, և այդժամ թող անի՝ ինչ կարող է, ոչ թե ստվերից, ինտրիգներով և խարդավանքներով, որոնք քայքայիչ ազդեցություն են ունենում ընդհանուր քաղաքական պրոցեսների համար:
Գագիկ Ծառուկյանին մնում է իր սխալն ուղղելու երևի թե այդ մի տարբերակը, այլապես իշխանության վերարտադրության հերթական ակտի գլխավոր պատասխանատուն բարոյահոգեբանական առումով այս անգամ դառնում է նա: 2008 թվականին այդ պատասխանատուն դարձավ Արթուր Բաղդասարյանը: 2012-13 թվականներին կդառնա Գագիկ Ծառուկյանը: Դե, իսկ պտուղները կրկին կքաղի Սերժ Սարգսյանը:
