Երկար ժամանակ ասվում էր, որ կրծքի քաղցկեղի մամոգրաֆիայի եղանակով ստուգումը չափազանց կարևոր է, քանի որ այն կարող է կյանքեր փրկել` նախապես պարզելով, որ հիվանդությունը առկա է օրգանիզմում: Արևմտյան շատ երկրներում կանայք անգամ նամակներ են ստանում, որոնցով ազգային առողջապահական կենտրոնները նրանց առաջարկում են գնալ և ստուգվել, քանի որ ստուգումը իրենից ոչ մի վտանգ չի ներկայացնում:
Անցած շաբաթ, սակայն, բրիտանական British Medical Journal ամսագրում հրապարակվել է մի հոդված, որն ապացուցված է համարում այն, որ վերոնշյալ ամբողջ ասվածը սուտ է, և որ մամոգրաֆիան ավելի շատ վնասում է, քան օգնում:
Ըստ The Telegraph-ի՝ նոր հետազոտության արդյունքները ցույց են տալիս, որ այն փաստը, թե մամոգրաֆիան կարող է կյանքեր փրկել, չափազանցված է և հաշվի չի առնվում այն վտանգը, որը կա նրանում: Հիմնական վտանգը սխալ ախտորոշումն է, որի պատճառով հաճախ կատարվում է վիրահատություն և բուժում, որոնց կարիքը չի զգացվում: Այս ամենը կատարվում է ավելի հաճախ, քան ենթադրելի է:
Մամոգրաֆիայի մեթոդը ներմուծվելով 25 տարի առաջ՝ ընդհանրապես հաշվի չի առել սխալ ախտորոշման հնարավորությունը, սակայն թվերը ապշեցուցիչ են: 2009 թվականի մեկ տասնամյակ տևած հետազոտության արդյունքում քաղցկեղի դեմ ստուգվելու հրավիրված ամեն 2000 կնոջից միայն մեկի կյանքը կփրկվի, իսկ տասը առողջ կանայք կրծքի քաղցկեղ ունենալու սխալ ախտորոշում կստանան: Այս կանայք կբուժվեն մի հիվանդության դեմ, որը չունեն, և դա կվնասի նրանց առողջությանը:
Հետազոտության հեղինակների կարծիքով՝ եթե անգամ ինչ-որ ծրագիր կարող է մի քանի կյանք փրկել, պետք է նաև հաշվի առնվեն այն վնասները, որ կան այդ ծրագրում: Նույն կերպ շատ այլ ծրագրեր կան, որոնք որոշ դեպքերում առավել արդյունավետ կարող են պայքարել քաղցկեղի դեմ, բայց դրանք չեն կիրառվում առկա վտանգի պատճառով:
Ինչպես նշվում է հոդվածում, ազգային առողջապահական կենտրոնները չպետք է մտածեն միայն փողի մասին:
