2011թ. դեկտեմբերի 8-ին Բրյուսելում բացվում է Եվրամիության անդամ երկրների գագաթնաժողովը, որը կտևի 2 օր: Այս մասին հաղորդում է РБК-ն՝ վկայակոչելով Եվրախորհրդի մամուլի ծառայությունը:
Առաջին աշխատանքային օրվա գլխավոր հարցերը կլինեն համաեվրոպական պարտքային ճգնաժամից դուրս գալու հետ կապված հնարավոր տարբերակների քննարկումը, որ տեղի կունենա հանդիպման մասնակիցների ոչ պաշտոնական ընթրիքի ժամանակ: Ընթրիքին ներկա կգտնվի Եվրոպական կենտրոնական բանկի տնօրեն Մարիո Դրագին:
Պարտքային ճգնաժամի խնդիրը կքննարկվի նաև գագաթնաժողվի երկրորդ օրը՝ դեկտեմբերի 9-ին՝ աշխատանքային նիստի շրջանակներում: Կքննարկվեն նաև եվրոպական տնտեսության համար նպաստավոր պայմաններ ստեղծելու շուրջ առաջարկները, ինչպես նաև եվրոպական տնտեսության հետագա ինտեգրացիայի հետ կապված հարցեր:
Ակնկալվում է, որ գագաթնաժողովի ընթացքում կստորագրվի Խորվաթիայի՝ Եվրամիությանն անդամակցելու պայմանագիրը և կդրվի Բուլղարիայի և Ռումինիայի՝ Շենգենյան համաձայնագրին միանալու հարցը: Կարծիքներ կփոխանակվեն նաև Իրանում տիրող իրավիճակի շուրջը:
