Մի քանի տասնյակ ամերիկացի միլիոնատերեր դիմել են Կոնգրես` պահանջելով բարձրացնել իրենց հարկերը: Ինչպես հաղորդում է CNNMoney-ն` նրանք ցանկանում են, որ օրենսդիրները չեղյալ համարեն իրենց հարկային արձակուրդները, որը սահմանվել էր նախկին նախագահ Ջորջ Բուշ Կրտսերի կողմից:
Այս խմբի ներկայացուցիչները Վաշինգտոնում հանդիպել են, այսպես կոչված, Սուպերկոմիտեի հետ, որը պետք է իրականացնի հարկային բարեփոխումները: Այդ կառույցի խնդիրն է մշակել ծրագիր, որը թույլ կտա բյուջեին առաջիկա 10 տարիների ընթացքում տնտեսել 1.2 տրլն դոլար: Օրինագիծը պետք է ընդունվի նոյեմբերի 23-ին:
Կալիֆոռնիացի միլիարդատեր Դուգ Էդվարդսը հայտարարել է` «եթե դուք աշխատում եք տարեկան ավելի քան մեկ միլիոն դոլար, պետք է ավելի շատ հարկ մուծեք»:
Իրենց հարկերը բարձրացնելու պահանջով հանդես եկող միլիոնատերերի այս խումբը ստեղծվել է մեկ տարի առաջ` Google ընկերության որոշ աշխատակիցների կողմից: Ավելի ուշ նրանց են միացել մի քանի հայտնի դեմքեր` տնտեսագետ Նուրիելա Ռուբինին, «Սոպրանոյի կլան » սերիալի աստղ Էդի Ֆալկոն և ռեժիսոր Աբիգայլ Դիսնեյը:
Հարկերը բարձրացնելու առաջարկով այս տարի հանդես է եկել աշխարհի ամենահարուստ մարդկանցից մեկը` միլիարդատեր Ուորեն Բաֆֆեթը: Նա դա պատճառաբանել է այն հանգամանքով, որ առավել քիչ ապահովված ամերիկացիները գործնականում ավելի շատ հարկ են վճարում, քան հարուստները:
Բաֆֆեթի առաջարկը պաշտպանել են աշխարհի այլ երկրների միլիոնատերեր: Մասնավորապես, Ֆրանսիայում նույնպես խոշոր գործարարները պատրաստակամություն են հայտնել ավելի շատ հարկ վճարել:
ԱՄՆ-ում հարկերը բարձրացնելու անհրաժեշտություն է առաջացել` կապված բյուջեի հսկայական դեֆիցիտի հետ:
