Ինչպես տեղեկացրել էինք, «Արայ» ընկերության սեփականատեր Արմեն Արայիկի Պետրոսյանը երեկ ինքնասպան է եղել: Հիշեցնենք, որ նրա հայրը՝ Արայիկ Պետրոսյանը, ևս ինքնասպան է եղել:
Ոստիկանությունից տեղեկացանք, որ փաստի առթիվ Կոտայքի քննչական բաժանմունքում հարուցվել է քրեական գործ 110-րդ հոդվածի 1-ին մասի (սպառնալիքի, դաժան վերաբերմունքի կամ անձնական արժանապատվությունը պարբերաբար նվաստացնելու ճանապարհով անձին անուղղակի դիտավորությամբ կամ անզգուշությամբ ինքնասպանության կամ ինքնասպանության փորձի հասցնելը) և 235-րդ հոդվածի 1-ին մասի (ապօրինի կերպով հրազեն, բացի ողորկափող հրազենից և դրա փամփուշտներից, ռազմամթերք, ակոսափող հրազենի փամփուշտներ, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) հատկանիշներով:
Այսօր փորձեցինք դեպքի կապակցությամբ պարզաբանում լսել «Արայ» ընկերությունից, սակայն ընկերության բոլոր մասնաճյուղերը փակ էին:
Հիշեցնենք, որ ոստիկանության Կոտայքի բաժնում հոկտեմբերի 16-ին, ժամը 13:15-ի սահմաններում, անհայտ քաղաքացուց ահազանգ է ստացվել, որ Սևան-Երևան մայրուղուց դեպի Գետամեջ գյուղ տանող հողածածկ ճանապարհին կայանված է BMW X-5 մակնիշի ավտոմեքենա, որի մեջ դիակ կա:
Ավտոմեքենայի աջ նստատեղին դրված սև կաշվե պայուսակի մեջ հայտնաբերվել է բելգիական արտադրության «Բրաունինգ» տիպի ատրճանակ` 53 փամփուշտներով, իսկ մեքենայի սրահում` «ՏՏ» տիպի ատրճանակի կրակված 1 պարկուճ:
Հանգամանքները պարզվում են, կատարվում է նախաքննություն:
Լուսանկարը՝ Գագիկ Շամշյանի
