Ֆուտբոլի աշխարհի առաջնության շրջանակում Ֆրանսիա-Պարագվայ հանդիպումն աչքի ընկավ ոչ թե ֆուտբոլային գեղեցիկ պահերով, այլ խաղացողների՝ ոչ այնքան ֆուտբոլային կեցվածքով։ Խաղի ընթացքում Պարագվայի հավաքականի ներկայացուցիչները բավական կոշտ պահվածք էին դրսևորում ֆրանսիացիների նկատմամբ, իսկ Ֆրանսիայի ավագ Կիլիան Մբապեն էլ խաղից հետո հրաժարվել էր սեղմել Պարագվայի հավաքականի դարպասապահի ձեռքը։
Այս դրվագից հետո պարագվայցի սենատոր Սելեստե Ամարիլյան կոշտ գրառում էր արել՝ Մբապեին անվանելով «ամբարտավան և տգեղ կամերունցի, որը զգուշորեն ձևանում է ֆրանսիացի», ինչպես նաև ափսոսանք էր հայտնել, որ խաղից հետո պարագվայցի խաղացողներից ոչ մեկը իրեն չի ապտակել։
Գրառումը մեծ արձագանք է գտել, պարագվայցի քաղաքական գործչին մեղադրում են ռասիզմի մեջ։
Նրան արձագանքել է Մբապեն՝ գրելով․ ««Տիկին Սելեստե Ամարիլա, դուք նողկալի կին եք, անարժան ձեր պաշտոնին: Դուք չեք ներկայացնում Պարագվայը, մի երկիր, որը մրցաշարի ընթացքում փայլել է»:
Իրավիճակը, սակայն, այսքանով չի ավարտվել։ Հարցին միջամտել են երկու երկրների նախագահները։
«Եվս մեկ գոլ Կիլիան Մբապեի համար։ Այս անգամ՝ ռասիզմի դեմ։ Ամբողջ ուժով աջակցում եմ։ Երբ խոսքերը վիրավորում են, մեր արժեքները պատասխանում են՝ արժանապատվություն, հարգանք, եղբայրություն»,- X-ի իր էջում գրել է Ֆրանսիայի նախագահ Էմանուել Մակրոնը։
Իր հերթին Պարագվայի նախագահ Սանտյագո Պենյան նամակ է հղել Մակրոնին, որում քննադատել է սենատոր Սելեստե Ամարիլյայի գրառումը։ Նույնաբովանդակ հայտարարություն է արել նաև Պարագվայի ԱԳՆ-ն։
Նշենք նաև, որ սենատորը կարճ ժամանակ անց հեռացրել է իր գրառումը, սակայն այն հասցրել է մեծ արձագանք գտել ու սկանդալի պատճառ դառնալ։
