Հուլիսի 2-ին Ուզբեկստանի նախագահ Շավքաթ Միրզիյոևը պաշտոնական այցով մեկնում է Թբիլիսի։ Այդ տեղեկությունը տարածել է saqinform պաշտոնական գործակալությունը՝ հղում անելով Վրաստանի նախագահի աշխատակազմի տարածած հաղորդագրությանը։ Ըստ այդմ, Ուզբեկստանի նախագահի ընդունելության արարողությունը տեղի կունենա Վրաստանի նախագահի նստավայրում։ Ծրագրով նախատեսված է Վրաստանի և Ուզբեկստանի նախագահների դեմ առ դեմ հանդիպում։ Կողմերը «կքննարկեն երկկողմ համագործակցության հեռանկարները, ինչպես նաև տարածաշրջանային ակտուալ օրակարգը»։ Այնուհետև Ուզբեկստանի նախագահը «պատվավոր հյուրերի գրքում գրառում կկատարի»։ Վրաստանի պաշտոնական լրատվամիջոցը հատուկ ընդգծել է, որ դիվանագիտական հարաբերությունների հաստատումից ի վեր դա Ուզբեկստանի նախագահի Վրաստան առաջին այցն է։
Անցյալ ամիս Վրաստանի վարչապետ Իրակլի Կոբախիձեն այցելել է Կենտրոնական Ասիայի երեք երկիր՝ Ղրղըզստան, Տաջիկստան և Ղազախստան։ Այդ հանդիպումների ընթացքում առաջնահերթ նշանակություն է տրվել Կենտրոնական Ասիայից դեպի Եվրոպա բեռնափոխադրումների շղթայում Վրաստանի «հանգուցային դերին»։ Saqinform-ի հաղորդագրությունից դատելով՝ Ուզբեկստանի նախագահի և Վրաստանի վարչապետի հանդիպում նախատեսված չէ։ Մինչդեռ Վրաստանը խորհրդարանական կառավարման երկիր է, և գործադիր իշխանությունը իրականացնում է վարչապետը։
Հունիսի վերջին Ուզբեկստան է այցելել Գերմանիայի նախագահ Շտայնմայերը։ Թեև նա փորձառու դիվանագետ և ճանաչված պետական գործիչ է, բայց Գերմանիան նույնպես խորհրդարանական կառավարման երկիր է։ Հաշվի առնելով, որ Ուզբեկստանի նախագահը Թբիլիսիում բանակցություններ կվարի Վրաստանի նախագահի հետ, կարելի է ենթադրել, որ Եվրամիություն-Ուզբեկստան առևտրատնտեսական հարաբերությունները դեռևս «նախամշակման փուլում» են, և Միրզիյոևը «ստուգողական այց» է կատարել։
Այդուհանդերձ, Կենտրոնական Ասիայի ուղղությամբ Վրաստանի դիվանագիտական «էքսպանսիան» չափազանց ուշագրավ է և, կարծես, ներգրվում է Թուրքիա-Վրաստան-Ադրբեջան համագործակցությանը, որ անցյալ ամիս ամրագրվել է արտաքին գործերի նախարարների մակարդակով ստորագրված «Ստամբուլյան հռչակագրով»։ Հարկ է ընդգծել, որ Ֆիդան-Բոճորիշվիլի-Բայրամով հանդիպումից հետո Թուրքիան և Վրաստանը համաձայնել են, որ Բաքու-Կարս երկաթուղու Ախալքալակ-Կարս հատվածը Հայաստան-Եվրոպա հաղորդակցության համար բացվի։
Ուզբեկստանը և Վրաստանը, ինչպես հետևում է պաշտոնական տեղեկատվությունից, առայժմ որևէ փաստաթուղթ չեն ստորագրի, բայց նախնական պայմանավորվածություններ, ամենայն հավանականությամբ, ձեռք կբերվեն։ Ադրբեջանը արդեն իսկ Կենտրոնական Ասիայի հետ հարաբերությունները 5+1 ձևաչափով ֆորմալացրել է։ Վրաստանը նույն հարթակին «կինտեգրվի՞»։ Ի՞նչ սկզբունքներով և ձևաչափով է Հայաստանը հարաբերվելու Կենտրոնական Ասիայի հետ։ Իսկ չհարաբերվել չի կարող։
