Ռուսաստանը Միացյալ Նահանգներին Ուկրաինայի հարցում «լիովին չեզոք» կողմ չի ճանաչում։ Այդ մասին ՏԱՍՍ-ի թղթակցին ասել է ՌԴ նախագահի մամուլի քարտուղար Դմիտրի Պեսկովը։ Արտաքին գործերի նախարար Սերգեյ Լավրովը իր հերթին անդրադարձել է անցյալ տարվա օգոստոսի 15-ին Անքորիջում Թրամփ-Պուտին հանդիպմանը և բացահայտել, որ դրա նախորդել է ԱՄՆ նախագահի հատուկ ներկայացուցիչ Ուիթկոֆի Մոսկվա այցը։
Լավրովը լրագրողներին ասել է, որ Թրամփ-Պուտին բանակցություններին ներկա է գտնվել նաև Ուիթկոֆը, և Ռուսաստանի նախագահը բառ առ բառ շարադրել է այն, ինչ Ուիթկոֆը ներկայացրել է Մոսկվայում՝ որպես ուկրաինական կարգավորման ամերիկյան առաջարկություններ եւ հարցրել, թե «ճի՞շտ է ինքը հիշում այդ գաղափարները» և «յուրաքանչյուր հարցի ստացել դրական պատասխան»։
Ռուսաստանի արտաքին գործերի նախարարը այդպիսով պատասխանել է ԱՄՆ պետքարտուղարին, ով նախօրեին Բահրեյնում հայտարարել է, որ Անքորիջում «համաձայնություններ չեն եղել, եղել են գաղափարներ, եթե համաձայնություն լիներ, պատերազմը ավարտված կլիներ»։ Լավրովը Վաշինգտոնին առաջարկել է իր դիրքորոշման մեջ «հստակություն մտցնել»։
Նույն օրը Ղրիմում և Սևստոպոլում մտցվել է «տեղական նշանակության արտակարգ դրություն»։ Ուկրաինական աղբյուրները հայտնել են, որ նախագահ Զելենսկին «քառասունօրյա ռազմական գործողությունների պլան է հաստատել»։ Հունիսի 26 -ի առավոտյան ժամերին Ղրիմից դուրս գալու հերթի կանգնած է եղել 2500 ավտոմեքենա։ Թերակղզու փաստացի իշխանությունները մինչեւ սեպտեմբեր դադարեցրել են նաև մանկական ճամբարների գործունեությունը։
Ի՞նչ ծրագիր է հաստատել Ուկրաինայի նախագահը, որևէ մանրամասնություն հայտնի չէ։ Ուկրաինական մամուլը և թելեգրամ-ալիքները ենթադրում են, որ «սկսվում է Ղրիմի ազատագրումը»։ Դժվար է ասել, թե ուկրաինական բանակը նման խոշորածավալ գործողությունների ունակ է, բայց եթե թերակղզու լոգիստիկ «շրջափակումը շարունակվի», ապա, թերևս, Ռուսաստանը «համաձայնի զորքերի շփման առկա գծով հրադադարի առաջարկությանը»։
Ռուսաստանի արտաքին գործերի նախարար Լավրովի կարծիքով՝ «չնայած տարընկալումներին, ԱՄՆ նախագահի վերջին հայտարարություններից տպավորություն է ստեղծվում, որ նա միջնորդական առաքելություն իրականացնելու պատրաստ» է։ Ըստ երևույթին, Ուկրաինայի հարցում որոշակի կանխատեսումներ հնարավոր կլինի անել Անկարայում ՆԱՏՕ-ի գագաթաժողովից հետո։
