Կոնգոյի Դեմոկրատական Հանրապետության արևելքում էբոլա վիրուսով վարակված 11 մարդ փախել է կարանտինային մեկուսարաններից: Այդ մասին հաղորդել է Bloomberg գործակալությունը:
Դեպքը տեղի է ունեցել էբոլայի բռնկման հիմնական օջախ համարվող Իտուրի նահանգում։ Ներկայում ընթանում են փախածների որոնումները:
Նահանգի որոշ հատվածներում անվտանգության իրավիճակը շարունակում է մնալ անկայուն, քանի որ զինված խմբավորումները շարունակում են սահմանափակել մարդասիրական կազմակերպությունների մուտքն ու գործունեությունը։
Բացի այդ, մեկ այլ միջադեպ է տեղի ունեցել հարավային Կիվու նահանգում։ Այնտեղ էբոլայից մահացածի դին անվտանգ հուղարկավորելու ժամանակ այդ գործողությունն իրականացնող խմբի վրա հարձակում է իրականացվել։ Խմբի անդամները ստիպված են եղել թողնել դագաղը և հեռանալ, իսկ տեղացիները դիպչել են դիակին։ Առողջապահական մարմինների գնահատմամբ՝ այս միջադեպը կարող է վարակի փոխանցման նոր շղթաների պատճառ դառնալ։
Ընդհանուր առմամբ, Կոնգոյի Դեմոկրատական Հանրապետությունում էբոլա տենդի ներկայիս բռնկման պատճառով բուժաշխատողների հսկողության տակ է գտնվում 4 200 մարդ: Վերջին շաբաթներին էբոլայից մահացածների կամ դրանով հիվանդացածների հետ շփում ունեցած մարդկանց հսկման մակարդակը կազմում է 46%: Առողջապահության համաշխարհային կազմակերպությունը պահանջում է, որ այդ թիվը լինի 95%-ի մակարդակում: Էբոլա վիրուսի ինկուբացիոն շրջանը 21 օր է:
Կոնգոյի առողջապահության նախարարության նորագույն տվյալների համաձայն՝ էբոլայից հաստատված մահերի թիվը կազմում է 62, իսկ հիվանացության հաստատված դեպքերի թիվը՝ 363:
