Ռուսական Regnum լրատվական գործակալության փոխանցմամբ՝ սիրիական Sana պետական հեռուստաընկերությունը հարցազրույց է վերցրել մի շարք սիրիացի կանանցից, ովքեր փախել էին Թուրքիա՝ փրկվելով սեփական երկրում ընթացող քաղաքացիական պատերազմի սարսափներից։ Այժմ նրանք ստիպված են եղել վերադառնալ հայրենիք, թեև վտանգը դեռ չի անցել։
Սիրիացի կանանցից մեկը՝ Ֆաթիման, պատմել է, որ Թուրքիայում նախ իրենց լավ են ընդունել, սակայն մի քանի օր անց սիրիացի փախստականները հայտնվել են սարսափելի վիճակում։ Նա պատմել է, որ իրեն շարունակաբար բռնաբարել են թուրք զինվորները, ովքեր պահպանում էին փախստականների վրանային ճամբարները։ Բացի այդ, թուրք զինվորները սպառնացել են սիրիացի կանանց, որ եթե նրանք դիմադրեն, ապա կբռնաբարվեն նաև նրանց դուստրերը (երեխաները)։
Ֆաթիման վստահեցնում է, որ միայն իրենց ճամբարում թուրք զինվորներն ու ծառայողները բռնաբարել են մինչև 70 կանանց, ընդ որում՝ տեսախցիկի օգնությամբ նկարահանելով իրենց այդ արարքը։
Թուրքական կողմը կտրուկ հերքում է այս տեղեկատվությունը։
Հիշեցնենք, որ սեպտեմբերի 1-ի դրությամբ՝ Թուրքիայի հարավարևելյան հատվածում առկա ճամբարներում գտնվում էին 6902 սիրիացի փախստականներ։ Ընդհանուր առմամբ, Սիրիայում ժողովրդական հուզումներ մեկնարկելուց հետո Թուրքիայում ապաստան գտնելու հույսով թուրք-սիրիական սահմանը հատել է Սիրիայի 16,920 քաղաքացի։
