ԱՄՆ-ում այսօր նշում են սեպտեմբերի 11-ի ահաբեկչության 10-ամյա տարելիցը: Զոհերի հիշատակին նվիրված միջոցառումներ կանցկացվեն Նյու-Յորքում` Համաշխարհային առևտրի կենտրոնի երկվորյակ աշտարակների նախկին տեղում, ինչպես նաև Պենտագոնի մոտ և Փենսիլվանիայում` այնտեղ, ուր ընկել էր ահաբեկիչների կողմից գրավված վերջին ինքնաթիռը: Նյու-Յորքում, այնպես ինչպես ամեն տարի, կկարդան երկվորյակ աշխատարկների փլուզման հետևանքով զոհված բոլոր անձանց և 4 ինքնաթիռներում պատանդ վերցված ուղևորների անունները: 4 անգամ կհայտարարվի մեկ րոպե լռություն, բոլոր այն րոպեներին, երբ կործանվել էին ինքնաթիռները: Նյու-Յորքում կբացվի սեպտեմբերի 11-ի զոհերի հիշատակին նվիրված հուշարձան, որտեղ գրված կլինեն բոլոր զոհերի անունները: Ինչպես հայտնում է CNN-ը, ԱՄՆ նախագահ Բարաք Օբաման բոլոր միջոցառումներին կմասնակցի նախկին նախագահ Ջորջ Բուշի հետ, որի նախագահության ժամանակ ԱՄՆ-ը բախվեց իր պատմության մեջ աննախադեպ հարձակման: Միաժամանակ տեղեկություններ են ստացվում այն մասին, որ ԱՄՆ հետախուզական ծառայությունները տվյալներ են ստացել, համաձայն որի սեպտեմբերի 11-ի 10-ամյա տարելիցի կապակցությամբ Ալ-Կաիդան մտադիր է նոր ահաբեկչություններ իրականացնել Նյու-Յորքում և Վաշինգթոնում, ինչի կապակցությամբ երկրի անվտանգության ծառայություններն անցել են խստացված հերթապահության: ԱՄՆ նախագահ Բարաք Օբաման հայտարարել է, որ վերջին 10 տարիները ցույց տվեցին, որ ԱՄՆ-ն ավելի ուժեղ է Ալ-Կաիդայից, իսկ ահաբեկչությունն անպայման պարտություն կկրի: Հիշեցնենք, որ 10 տարի առաջ այս օրը` 2001թ-ի սեպտեմբերի 11-ին, Ալ-Կաիդայի գրոհայինները առևանգել էին 4 ուղևորատար ինքնաթիռներ, որոնցից երկուսը մխրճել էին Նյու-Յորքում Համաշխարհային առևտրի կենտրոնի երկու երկնաքեր աշտարակների մեջ, մի ինքնաթիռ ընկել էր Պենտագոնի վրա, ևս մեկը, ուղևորների ակտիվ դիմադրության և հերոսության արդյունքում, չէր հասել իր նպատակակետին և ընկել էր Փենսիլվանիա նահանգում: Սեպտեմբերի 11-ի զոհերի թիվն անցել էր 3000-ը: Ահաբեկչությունից հետո ԱՄՆ-ը NATO-ի ուժերի հետ ահաբեկչության դեմ պայքարի նպատակով լայնամասշտաբ ռազմական գործողություններ սկսեց Աֆղանստանում և տապալեց Տալիբան շարժման իշխանությունն այդ երկրում: Ահաբեկիչների դեմ համաշխարհային պայքարն այդ օրվանից հետո նոր փուլ մտավ: Նշենք, որ Ալ-Կաիդայի առաջնորդ, սեպտեմբերի 11-ի գլխավոր կազմակերպիչ Ուսամա Բեն Լադենին ամերիկյան հատուկջոկատայինները գտան և ոչնչացրեցին միայն այս տարվա մայիսին:
