Facebook սոցիալական ցանցում նախօրեին բացվել է «Օգնենք Հովհաննես Գրիգորյանին» էջը, որի նպատակը տաղանդավոր բանաստեղծ Հովհաննես Գրիգորյանին օգնելն է: «Օգնենք Հովհաննես Գրիգորյանին» նախաձեռնության կազմակերպիչ-անդամ, բանաստեղծ Տաթև Չախչախյանն «Առաջին լրատվականի» հետ զրույցում նշեց, որ այսօր պատրաստվում են նամակով դիմել նախագահ Սերժ Սարգսյանին` խնդրելով օգնել ու դրամական օժանդակություն ցուցաբերել բանաստեղծին:
Նա տեղեկացրեց, որ Facebook սոցիալական ցանցում էջ բացելու գաղափարն իր ու նախաձեռնության մյուս անդամների մոտ ծագեց այն ժամանակ, երբ իմացան բանաստեղծի հիվանդության մասին, ու պարզվեց, որ անհրաժեշտ է շտապ վիրահատություն:
«Facebook-ը` որպես ցանց, տալիս է արագ ու լայն մասշտաբներով տեղեկատվություն տարածելու հնարավորություն, ու մի քանի ժամում լուրը հասավ մեծաթիվ մարդկանց, ովքեր ցանցն օգտագործում են նաև ժամանցի համար»,- հայտնեց Տ.Չախչախյանը` տեղեկացնելով, որ նախաձեռնության մեջ ներգրավված են հիմնականում երիտասարդ գրողներ, գրականագետներ ու մտավորականներ:
Նրա խոսքով, արդեն իսկ դրամական փոխանցումներ են կատարել Հայաստանի ու Արցախի գրողների միությունները, մշակույթի նախկին փոխնախարար Դավիթ Մուրադյանը, բանաստեղծ Արտեմ Հարությունյանը, Հայաստանի գրողների միության նախագահ Լևոն Անանյանը, շարքային մարդիկ, անգամ ԱԺ նախագահ Հովիկ Աբրահամյանն է ասել, որ կփոխանցի իր մեկ ամսվա աշխատավարձը:
«Արդեն շուրջ 1 միլիոն դրամ հավաքվել է` չհաշված այսօրվա հանգանակությունները: Էջը կշարունակվի այնքան, մինչև չհավաքվի ամբողջ գումարը: Օգնություն է ուղարկվում բոլոր հնարավոր վայրերից`ԱՄՆ, Ռուսաստան»,- հայտնեց նա:
Տաղանդավոր բանաստեղծի մոտ հայտնաբերվել է թոքի քաղցկեղ, որի վիրահատությունը հնարավոր է իրականացնել միայն Գերմանիայում: Բուժման համար անհրաժեշտ է 50 հազար դոլար: Հանգանակությունները հնարավոր է կատարել Pro Credit բանկում բացված հետևյալ հաշվեհամարներին` AMD 253090017430-0090, EUR 253090017448-0092, USD 253090017455-0091:
Բանաստեղծը մի շարք ժողովածուների հեղինակ է`«Հրեշտակներ մանկության երկնքից» (1992), «Երկու ջրհեղեղի արանքում» (1996), «Կես ժամանակ (2002), «Գիշերահավասար» (2006), «Երբեք չմեռնես`ահա, թե ինչ կասեմ քեզ» (2010), արժանացել է մի շարք մրցանակների ու պարգևների:
