Ռուսաստան կատարած այցից առաջ Թուրքիայի նախագահ Աբդուլլահ Գյուլը հարցազրույց է տվել Московский Комсомолец-ին, որում անդրադարձ է կատարել ղարաբաղյան հակամարտության և հայ-թուրքական հարաբերությունների կարգավորման խնդիրներին.
«Ակնհայտ է Հարավային Կովկասի հատուկ կարևորությունը. այդ տարածաշրջանը սահմանակից է թե՛ Թուրքիային, թե՛ Ռուսաստանին։ Մենք ղեկավարվում ենք այն մարտավարությամբ, որն ուղղված է մերձակա տարածաշրջանում խաղաղության, կայունության ու բարեկեցության հաստատմանը։
Ինչպես հայտնի է, ղարաբաղյան հակամարտությունը ներկայումս Հարավային Կովկասում այդպիսի բարենպաստ կլիմայի հասնելու ճանապարհին ընկած գլխավոր խոչընդոտն է։ Ես կարծում եմ, որ այս հարցում Թուրքիայի մոտեցումը համընկնում է Ռուսաստանի դիրքորոշման հետ։ Ղարաբաղյան հակամարտության կարգավորման ճանապարհին ձեռք բերվելիք առաջընթացն այդ տեսանկյունից կարող է ունենալ վճռորոշ նշանակություն։
Դրա հետ կապված՝ ցանկանում եմ ևս մեկ անգամ ընդգծել, որ մենք պատրաստ ենք բազմակողմ աջակցություն ցուցաբերել խնդրի կարգավորման ուղիների որոնմանը, որում ներգրավված է անձամբ Ռուսաստանի նախագահ Դմիտրի Մեդվեդևը։ Մենք պատրաստ ենք անել ամեն անհրաժեշտ բան հակամարտության հետագա կարգավորման համար։
Այդ ճանապարհին ձեռք բերված առաջընթացը, անկասկած, դրականորեն է ազդելու նաև հայ-թուրքական հարաբերությունների վրա։ Այդպիսին է Հայաստանի հետ հարաբերությունները կարգավորելու վերաբերյալ Թուրքիայի դիրքորոշումը։ Մենք անկեղծորեն ցանկանում ենք, որ կարգավորման գործընթացը հաջողությամբ ավարտվի։
Հարավային Կովկասում կայուն խաղաղության և տարածաշրջանի երկրներում համագործակցության ու բարեկեցության հաստատման գործընթացում Ադրբեջանի և Հայաստանի, ինչպես նաև Թուրքիայի և Ադրբեջանի հարաբերությունների կարգավորումը պետք է ընկալվի որպես առանձին գործընթաց, այն պետք է դիտարկել համատարածաշրջանային մակարդակով»։
