«ԵԱՀԿ գրասենյակը միշտ աջակցում է տարբեր ոլորտների բարեփոխման ծրագրերին, և այժմ մենք ներգրավված ենք մի քանի ոլորտներում բարեփոխումները խթանելու գործում, որոնցից , սակայն, կարևորում եմ ոստիկանական համակարգի, քրեական արդարադատության և դատական համակարգի բարեփոխումները»,- այսօր ՀՀ գլխավոր դատախազության և ԵԱՀԿ երևանյան գրասենյակի միջև փոխըմբռնման հուշագրի ստորագրման ժամանակ նշեց ԵԱՀԿ երևանյան գրասենյակի ղեկավար, դեսպան Սերգեյ Կապինոսը:
Նա նշեց, որ բարեփոխումները պետք է ունենան ամբողջական բնույթ, քանզի եթե մի համակարգում դրանք արվում են, իսկ մյուսը բաց է մնում, ապա այն միանգամից իր ազդեցությունը թողնում է մյուսների վրա:
Կապինոսը կարևորեց քրեական արդարադատության ոլորտում կատարվող բարեփոխումները, նշելով, որ դրանք նպատակ են հետապնդում վստահություն սերմանել արդարադատության իրականացման հանդեպ: Կապինոսը վստահ է, որ եթե արդարադատության նկատմամբ հասարակությունն ունի հավատ և վստահություն, ապա երկրում օրենքի գերակայությունն արդեն խնդիր չի լինի:
Դեսպան Կապինոսը հույս հայտնեց, որ իրենց աջակցությամբ և ՀՀ գլխավոր դատախազության հետևողական աշխատանքի շնորհիվ հնարավոր կլինի հասնել այդ ամենին:
