Վրաստանի նախագահ Սալոմե Զուրաբիշվիլին բազմիցս խախտել է հանրապետության սահմանադրության սկզբունքները, ինչի առնչությամբ կառավարությունը նախատեսում է մոտ ապագայում դիմել Սահմանադրական դատարան։ Այս մասին ասվում է երեքշաբթի հրապարակված «Վրացական երազանք՝ դեմոկրատական Վրաստան» իշխող կուսակցության հայտարարության մեջ։
Իշխող կուսակցությունը պնդում է, որ պետության ղեկավարը բազմիցս հրաժարվել է կառավարության առաջարկով մի շարք դեսպաններ նշանակել, ինչպես նաև մի շարք այցեր է կատարել արտասահմանյան երկրներ՝ առանց նախարարների կաբինետի նախնական համաձայնության, ինչը սահմանադրության խախտում է։
«Վերջին ամիսների ընթացքում տեղի են ունեցել հանդիպումներ կառավարության ներկայացուցիչների և նախագահի միջև, որոնց ժամանակ նախագահին բազմիցս բացատրվել է Վրաստանի սահմանադրության բովանդակությունը, սակայն, ցավոք, ապարդյուն: Այս պայմաններում Վրաստանի կառավարությունը ստիպված է առաջիկայում դիմել Սահմանադրական դատարան՝ իրավասությունների շուրջ վեճի շրջանակներում և պահանջել Վրաստանի նախագահի կողմից սահմանադրության խախտման հաստատումը»,- ասված է հաղորդագրությունում։
