Աճուրդների տվյալները վկայում են, որ ասիական ֆոնդային ինդեքսները, բացառությամբ Հոնկոնգի Hang Seng-ի, երկուշաբթի իջել են, երբ ԱՄՆ ԴՊՀ-ի կողմից տնտեսությունը խթանող միջոցները չարդարացնելու մասին խոսակցություններ են տարածվել:
Հոնկոնգի Hang Seng-ը ֆոնդային շուկաների փակման ժամանակ բարձրացել է 0.24%-ով, մինչև 19446.69 նիշ: Կորեայի KOSPI-ն կրճատվել է 1.96%-ով մինչև 1710.70 նիշ: Շանհայի SSE Composite ֆոնդային ինդեքսը ընկել է 0.73%-ով` 2515.86 նիշ: Ճապոնական Nikkei 225 իջել է 1.04%-ով` կազմելով 8628.12 նիշ:
Աճուրդի մասնակիցները սպասում են, որպեսզի ԱՄՆ ԴՊՀ-ի ղեկավար Բեն Բերնանկեն ուրբաթ իր ելույթում խոսի ԱՄՆ տնտեսական աճի բարձրացմանն ուղղված հնարավոր նոր միջոցների մասին, որի տեմպը վերջին շրջանում զգալիորեն նվազել է: Նախնական գնահատականով՝ ԱՄՆ ՀՆԱ-ն երկրորդ եռամսյակում աճել է ընդամենը 1.3%-ով՝ առաջին եռամսյակի համեմատ: Դրա հետ մեկտեղ վերլուծաբանները չեն բացառում, որ երկրորդ գնահատականը, որը հայտնի կլինի ուրբաթ օրը, կարող է վկայել ավելի դանդաղ աճի տեմպի մասին` 1.1%:
ԱՄՆ տնտեսության համար մտավախություններից բացի՝ ներդրողների ուշադրության կենտրոնում շարունակում է մնալ եվրագոտու պարտքային ճգնաժամը: Կրակի վրա յուղ է լցնում Ֆրանսիայի նախագահ Նիկոլա Սարկոզիի և Գերմանիայի կանցլեր Անգելա Մերկելի չկամությունը եվրոպարտատոմսերի` որպես հակաճգնաժամային գործիքի թողարկման համար:
«Ներդրողները ավելի տպավորվող են դարձել վատ նորությունների հանդեպ, և պակաս զգայուն լավերի հանդեպ»,- կարծում է Shanghai Securities Co.-ի վերլուծաբան Տու Յունը: Համաշխարհային տնտեսության դանդաղ աճի հանդեպ մտավախությունները շուկայում «արջի» տրամադրություն են պահպանում:
