Հայաստանի պաշտպանության նախարարությունը տեղեկություն է հայտնել հայ-ադրբեջանական սահմանի արևմտյան հատվածի դիրքերի ուղղությամբ ադրբեջանական զինուժի նշանային կրակի մասին, ինչի հետևանքով Հայաստանի զինված ուժերի պայմանագրային զինծառայող, սերժանտ Հրաչ Արամի Մանասարյանը զոհվել է, իսկ նրա ծառայակիցը, վիրավորվել: Վիրավոր զինծառայողի կյանքին վտանգ չի սպառնում: Ողբերգական դեպքը ըստ տեղեկությունների եղել է Երասխի հատվածում, մարտի 7-ի կեսօրին:
Տևական ժամանակ հայ-ադրբեջանական սահմանին հարաբերական կայունություն էր, առանց ողբերգական միջադեպերի: Այդ կայունությունը ընդհատվում է: Հարց է, ընդհատվում է ողբերգական միջադեպով, թե՞ այդ միջադեպը ավելի երկարաժամկետ անկայունության մտադրությունների կամ ծրագրերի մաս է, որ դիտարկում է Ադրբեջանը: Բանն այն է, որ Բաքուն տևական ժամանակ տեղեկություններ է հրապարակում իբրև թե հայկական կողմից հրադադարի խախտումների մասին, որոնք հերքում էր Հայաստանի ՊՆ-ն: Միաժամանակ, Ադրբեջանը իրավիճակը լարված էր պահում նաև Արցախի ուղղությամբ, մասնավորապես շփման գոտուն մոտ գտնվող Խրամորթ գյուղի, որի ուղղությամբ նախօրեին եղել են առավել ինտենսիվ կրակահերթեր: Սա թույլ է տալիս խոսել այն մասին, որ Ադրբեջանը իրավիճակը լարում է որոշակիորեն համակարգված: Այս հանգամանքը առավել զգայուն է դառնում ուկրաինական պատերազմի ֆոնին, ինչի առանչությամբ հենց սկզբից եղել են դիտարկումներ, թե այդ պատերազմը ինչ ռիսկեր կարող է պարունակել Կովկասում իրավիճակի կայունության, անվտանգության տեսանկյունից:
Հատկանշական է մի բան, որ լարվածությունը փաստորեն աճում է ռուս-թուրքական բանակցային գործընթացին զուգահեռ, որ մասնավորապես բավականին ակտիվ ծավալվեց նախօրեին: Մարտի 6-ին տեղի է ունեցել թե Էրդողան-Պուտին հետախոսազրույց, թե հեռախոսազրույց Չավուշողլուի և Լավրովի միջև: Հազիվ թե Ուկրաինայում «խրված» Ռուսաստանի համար ցանկալի լինի անկայունության ռիսկը Կովկասում: Ավելին, Մոսկվան փորձեց այդ առումով իրեն ապահովագրել Բաքվի հետ «դաշնակցային հռչակագրով»: Մյուս կողմից, իրավիճակի ապակայունացումը կարող է լինել հենց Մոսկվայի վրա ճնշման միջոց: Ընդ որում, ուշադրության է արժանի հանգամանքը, որ դա տեղի է ունենում Նախիջևանի ուղղությունից, որտեղ բավականին մեծ է Թուրքիայի ազդեցությունն ու ներկայությունը:
Լուսանկարը՝ hetq.am-ի
