Հայաստանի արտգործնախարարությունն արձագանքել է Ադրբեջանին՝ ԵԱՏՄ-ում դիտորդի կարգավիճակ տալու Ղազախստանի առաջին նախագահ Նազարբաևի առաջարկին։ ԱԳՆ խոսնակ Վահան Հունանյանը մասնավորապես նշել է, որ այս պահի դրությամբ որևէ պետության կողմից Եվրասիական տնտեսական միությունում դիտորդի կարգավիճակ ստանալու հայտ չկա։ Միևնույն ժամանակ Հունանյանը նշել է, որ հարցը պահանջում է կոնսենսուսային որոշում։
Փորձագետ Արբակ Խաչատրյանն՝ ի հեճուկս հնչող քննադատությունների, գտնում է, որ Ադրբեջանի՝ ԵԱՏՄ անդամ դառնալը կամ դիտորդի կարգավիճակ ստանալը մեզ համար օգուտ կլինի։ Իր պնդումը Խաչատրյանը հիմնավորում է հետևյալ կերպ․ «Նախևառաջ՝ ուղիղ երկխոսություն կլինի։ Այն ժամանակ թիկունքից էր կառավարում, կամակատարները՝ պահանջները բավարարում։ Ընկերներին մի բան ասում էր, գալիս հաստատում էին, իսկ նման հեռանկարի պայմաններում՝ ինքն իր համար կասի, ավելի բաց կխաղա։ Մեկով ավել պակասն էլ մեզ համար վնաս չի լինի»-«Առաջին լրատվական»-ի հետ զրույցում ասաց նա։
Խաչատրյանը մեջբերում է տարիներ առաջ ռուս գործիչ Վլադիմիր Ժիրինովսկու ասածները՝ եթե ուզում եք ՆԱՏՕ-ն քանդվի, եկեք մտնենք ՆԱՏՕ, միանգամից կքանդվի․«Հիմա եթե այսօր Ադրբեջանը տնտեսական որոշակի հաջողություններ էլ ունի՝ չհանդիսանալով որևէ կառուցի անդամ, մտնելուց հետո նման հաջողություններ չի ունենալու, շատ հարցերում կաշկանդված է լինելու»։
Մեր զրուցակիցն անդրադառնալով պաշտոնական Երևանի դիրքորոշման այս հարցում, նկատեց՝ նախկին իշխանություններն ամբողջությամբ պրոռուսական էին, իսկ ներկաները՝ ձայնի իրավունք չունեն․«Նախկինները չէին խոսում, որովհետև ամբողջությամբ Ռուսաստանի տակ էին․․ տուն, տեղ, պատեր՝ ամբողջը ծախեցին ռուսներին, իսկ նորերը դրսում առհասարակ չեն խոսում, մեղմ ասած, անմեղսունակ են։ Այդ ոլորտում Հայաստանն ամենաանկախ պետությունն է, իրենից ոչինչ կախված չէ։ Դրա համար չեմ կարծում, թե Հայաստանի դիրքորոշումն էական նշանակություն ունի»։
Արբակ Խաչատրյանը, միևնույն ժամանակ, չի կարծում, թե բարոյական տեսակետից նորմալ կընկալվի՝ մի քանի ամիս առաջ հազարավոր զոհեր տալն ու հետո նույն սեղանի շուրջ նստելը․ «Մենք հիմա պարտված երկիր ենք և այո՛, ես այն կարծիքն եմ, որ այդ պարտության հիմքը նախկիններն են դրել, բայց այնպես չէ, որ ներկաները չունեն իրենց մեղքի չափաբաժինը ու հիմա որոշումներ կայացնելու իրավունք ու հնարավորություն չունեն։Ես նաև չեմ հասկանում այն տեսակետները, թե ԱՄՆ-ից ու Ադրբեջանից վտանգ չկա։ Ամերիկայի քաղցր կյանքից գալիս ու նման պարտվողական հայտարարություններ են անում։ Իմաստը ո՞րն է։ Ես նման դաշտ մտնելը ներկայիս իշխանությունների պարագայում խիստ վտանգավոր եմ համարում, քանի որ Հայաստանը որպես պետություն այսօր դիրք չունի>>,-ընդգծեց մեր զրուցակիցը։
