«Հայաստան», «Պատիվ ունեմ» դաշինքները, «Զարթոնք» կուսակցությունը դիմել են Սահմանադրական դատարան՝ վիճարկելով հունիսի 20-ին կայացած արտահերթ խորհրդարանական ընտրությունների արդյունքները:
Հաշվի առնելով դատարանների ոչ անկախ լինելը, իսկ Սահմանադրական դատարանում խնդրահարույց դատավորների ներգրավումը ՔՊ ցուցակով պատգամավոր ընտրված Վիգեն Խաչատրյանից հետաքրքրվեցինք՝ արդյոք չունի մտահոգություն, որ Սահմանադրական դատարանը կարող է ոչ հօգուտ իշխանության որոշում կայացնել․ «Չեմ կարծում, թե Սահմանադրական դատարանը հիմք ունի այլ որոշում կայացնելու։ Այն փաստերը, որ ներկայացվում են՝ անհեթեթ են։ Խելագարություն կլինի, եթե ՍԴ-ն նմանատիպ որոշում կայացնի։ Ես չեմ կարող ասել, թե ինչ մտահոգություն ունեն իշխանությունները, բայց ըստ իս, դիմողները իրական հիմքեր չունեն»-«Առաջին լրատվական»,-ի հետ զրույցում ասաց նա։
Մերն այն հարցին, թե այս օրերին շատ է քննարկվում իշխանությունների հայտարարությունները կադրային ջարդ իրականացնելու մասին, Վիգեն Խաչատրյանը պատասխանեց․«Իրականում այդ կարդային ջարդ ձևակերպումը մի քիչ անհաջող ձևակերպում է։ Ցանկալի երևույթ չէ, սխալ է։ Բայց բոլոր նրանք, ովքեր այս տարիների ընթացքում դրսևորեցին անգործություն կամ իրականում անթաքույց բոյկոտում էին ծրագրերի իրականացումը, նրանք, անշուշտ, պետք է ասպարեզից հանվեն, իրենց տեղը զիջեն ավելի կարող ուժերի»։
Խաչատրյանի խոսքերով՝ ցանկացած մարդ, որն իր տեղում իր պարտականությունները լավ չի կատարում, պետք է ասպարեզը զիջի ավելի կարող, գիտակից աշխատողի։
Նոր, թարմ ուժերի ներգրավումն, ըստ մեր զրուցակցի շատ բան կփոխի․«Որովհետև ակնհայտ է, որ կա մի հստակ շերտ, որը դիմագրավում է անհրաժեշտ փոփոխություններին։ Նրանք պետք է ասպարեզից հանվեն։ Եվ սա վերաբերում է ոչ միայն նախկիններին։ Կարող է նորերի մեջ էլ լինեն մարդիկ, որոնք լավ չեն աշխատել, այստեղ նախկինի խնդիր չկա։ Կան որոշակի հարցադրումներ, որոնք պետք է կյանքի կոչվեն և նրանք, ովքեր կա՛մ չեն կարող կա՛մ չեն ցանկանում, պետք է իրենց համար այլ զբաղմունք գտնեն։ Բայց այդ ամենը պետք է արվի օրենքի տառին համապատասխան։ Կամայականություններ չպետք է դրսևորվեն»։
Դիտարկմանը, թե հասարակության մի շերտ էլ կոշտ մեթոդների կողմնակից է, Վիգեն Խաչատրյանն ասաց․«Կոշտ կամ փափուկ մեթոդն ինձ համար արժեք չէ։ Կա օրենք և պետք է շարժվել օրենքով։ Օրինախախտը պետք է կանչվի պատասխանատվության, վատ աշխատողը պետք է հեռացվի։Այսինքն կոշտի ու փափուկի խնդիր չկա, կա օրենքին հետևելու պահանջ»։
