Կրթության ոլորտում 21 տարվա փորձ ունեցող ՝ Հայաստանի ֆրանսիական համալսարանը Ֆրանսիայի Թուլուզ III Պոլ Սաբատիե համալսարանի հետ համագործակցությամբ իրականացնելու է «Արհեստական բանականություն» մագիստրոսական ծրագիր: «Արմենպրես»-ի մամուլի սրահում հրավիրված ասուլիսում Հայաստանի ֆրանսիական համալսարանի ռեկտոր, պրոֆեսոր Բերտրան Վենարը նշեց, որ իրենք աշխատում են ստեղծել ծրագրեր, որոնց կարիքն ունի Հայաստանը: Գերատեսչությունների հետ համատեղ աշխատանքից զատ, համալսարանը համագործակցում է ոլորտի ձեռնարկատերերի հետ՝ լսելով նրանց պահանջմունքները:
«Բոլոր երկրները շատ մեծ հետաքրքրվածություն ունեն լավ մասնագետներ ունենալու հարցում, և Հայաստանը բացառություն չէ: Շահագրգռվածությունը գալիս է նաև ձեռնարկությունների կողմից, որոնք ասում են, որ աշխատուժի պակաս են զգում: Մենք հետաքրքրություն տեսնում ենք նաև ուսանողների կողմից: Մեր ներկայացրած մագիստրոսական ծրագիրը էկոհամակարգի կենտրոնում կլինի: Մենք շահագրգռված ենք այդ մագիստրոսական ծրագիրը կյանքի կոչելու հարցում՝ խթանելով գիտահետազոտական աշխատանքների իրականացմանը»,-ասաց Բերտրան Վենարը:
Մագիստրոսական նոր ծրագրով առաջին ուսանողներին համալսարանը սպասում է սեպտեմբերին: Դասընթացներն անցկացվելու են երեկոյան, ինչը հնարավորություն կտա աշխատող ուսանողներին համատեղել ուսումն ու աշխատանքը: Տեղի ուսանողներից բացի, կարող են ընդգրկվել նաև արտասահմանցիներ:
ՀՀ բարձր տեխնոլոգիական արդյունաբերության փոխնախարար Դավիթ Սահակյանի խոսքով, շատ կարևորում են ֆրանսիացի գործընկերների հետ համագործակցության հնարավորությունները: Նա նշեց, որ արհեստական բանականության ոլորտը շատ կարևոր է Հայաստանի տնտեսության համար, այս ուղղությամբ կադրային արդյունավետ քաղաքականությունը առաջնային հարցերից է:
«Կրթական համակարգը պատրաստ չէ աշխատանքի պահանջարկը բավարարել, իսկ պահանջարկը մեծ է ու աճում է: Մի քանի ընկերությունների վերջին տվյալներ ներկայացնեմ, մինչև տարվա վերջ արհեստական բանականության ոլորտում 400-ից ավելի աշխատողի կարիք են ունենալու: Ընդհանուր ոլորտի պահանջարկի բավարարման համար այս կրթական ծրագիրը ևս մի քայլ է պահանջված մասնագետներ պատրաստելու և թույլ չտալու կադրային արտահոսք երկրում, միջոցները, ֆինանսավորումը գնան այլ երկրներ: Մագիստրոսական ծրագիրը ևս մեկ ներդրում է ոլորտի էկոհամակարգի ու ստարտափերի զարգացման ուղղությամբ»,-ասաց Դավիթ Սահակյանը:
Թուլուզ III Պոլ Սաբատիե համալսարանի Գիտությունների և ճարտարագիտության ֆակուլտետի ինֆորմատիկայի ամբիոնի վարիչ, Հայաստանի ֆրանսիական համալսարանի ինֆորմատիկայի և կիրառական մաթեմատիկայի ֆակուլտետի համադեկան Ալեն Կրուզիլը նշեց, որ իրենց դասախոսները գալու են դասավանդելու Երևանում:
«Մեր համագործակցությունը Հայաստանի ֆրանսիական համալսարանի հետ տարիների պատմություն ունի: Ուրախ եմ, որ համագործակցությունը շարունակվում է այս մագիստրոսական ծրագրով: Ասեմ, որ բակալավրի մակարդակում նախատեսվում է 10 դասախոսի այց, որոնք արդեն եկել են և դեռ կգան: Մագիստրատուրայի համար նախատեսվել է նույնքան դասախոսների այց Հայաստան: Առաջին խումբը ներկա կլինի Երևանում սեպտեմբերին»,-ասաց Ալեն Կրուզիլը:
Մագիստրոսական ծրագրի շրջանակում նախատեսված է պրակտիկ դասընթաց կազմակերպություններում: Լավագույն ուսանողների համար հնարավոր կլինի պրակտիկ դասընթացը կազմակերպել նաև Ֆրանսիայում: Հայաստանի ֆրանսիական համալսարանի Ինֆորմատիկայի և կիրառական մաթեմատիկայի ֆակուլտետի դեկան Քրիստինա Սարգսյանը նշեց, որ հնարավորություն կա հյուրընկալելու ֆրանսիացի ուսանողներին, որը յուրօրինակ փորձի փոխանակում կարող է լինել:
«Մեր ծրագիրը ներառում է արհեստական բանականության երկու հիմնական ճյուղերն էլ: Ուսանողը ինքը կորոշի որ ուղղությամբ մասնագիտանա: Մեզ մոտ դասավանդման համար գալու են Թուլուզի գործող դասախոսները»,- ասաց Քրիստինա Սարգսյանն՝ ընդգծելով, որ ուսանողները ներգրավված են լինելու գիտահետազոտական աշխատանքներում:
