Պաշտպանության նախարարությունը հայտարարություն է տարածել, որտեղ ասվում է՝ չնայած ավելի վաղ արված պաշտոնական պարզաբանմանը, ի պատասխան հարցումների, որոնք շարունակում են ստացվել լրատվամիջոցներից, ևս մեկ անգամ նշում ենք, որ պաշտպանության նախարարությունը չի նախատեսում ՀՀ զինված ուժերի ստորաբաժանումների մասնակցությունը ՆԱՏՕ-ի «Defender Europe 21» զորավարժությանը:
Քաղաքական մեկնաբան Հակոբ Բադալյանն «Առաջին լրատվական»-ի հետ զրույցում նշեց՝ թեպետ ծանոթ չէ, թե այդ զորավարժություններն ինչ բնույթի են լինելու, մեր ցանկացած մասնակցություն չպետք է կրի մեխանիկական բնույթ.«Դրան մասնակցել-չմասնակցելը պետք է գործնական նշանակություն ունենա։ Քաղաքական իմաստով իրավիճակը շատ պարզ է՝ պատերազմից առաջ էլ Հայաստանը չէր մասնակցում ՆԱՏՕ-ի բոլոր զորավարաժություններին և աստիճանաբար ավելի քիչ էր սկսել մասնակցել։ Իսկ պատերազմից հետո առավել ևս Հայաստանը զգուշանում է արևմուտք-Ռուսաստան դիմակայության առավել սրված փուլում ինչ-որ քայլեր իրականացնելուց։ Այսինքն՝ չի անում այնպիսի քայլեր, որոնք Ռուսաստանի մոտ խանդ կամ Հայաստանի հանդեպ ճնշման առիթ են տալու։ Այս իմաստով քաղաքական տեսանկյունից չմասնակցելու մոտիվն այս դաշտում է»։
Ըստ Բադալյանի՝ խնդիրը հետևյալն է.«Հայաստան-ՆԱՏՕ, Հայաստան-Միացյալ Նահանգներ հարաբերության գնահատականը պետք է կառուցվի այլևս բովանդակային և գաղափարական նոր դաշտում, նոր մշակումներում ու այլևս չչափվի ՆԱՏՕ-ի զորավարժություններին մասնակցել-չմասնակցելու հանգամանքով։Ես կարծում եմ՝ Հայաստան-ՆԱՏՕ, Հայաստան-Միացյալ Նահանգներ հարաբերությունները լրջագույն վերափոխման կարիք ունեն և մասնակցել-չմասնակցելն արդեն շատ հին չափորոշիչ է։ Մենք պետք է խորքային առումով՝ քաղաքական, հասարակական-քաղաքական դաշտում լրջագույն քննարկումներ ծավալենք, թե ինչպիսին պետք է լինեն Հայաստան-ՆԱՏՕ, Հայաստան-Միացյալ Նահանգներ հարաբերությունները։ Այն, որ դրանք պետք է սերտ ու խորը զարգացման տրամաբանության մեջ դիտարկենք ու մեր ճանապարհն ու ուղենիշը դա պետք է լինի՝ որևէ կասկած չկա, որովհետև սա Հայաստանի համար անվտանգային առաջնահերթություն է։ Հատկապես այն, ինչ մենք տեսանք պատերազմի ընթացքում և պատերազմի արդյունքում՝ մեզ համար պետք է դաս լինի»։
Մեր զրուցակցի խոսքերով՝ Հայաստանի անվտանգության դիվերսիֆիկացիայի խնդիրը մեզ համար կենսական անհրաժեշտություն է.«Այդ հարցը պետք է դիտարկել շատ խորը և շատ լրջորեն ու չչափել զորավարժությանը մասնակցել-չմասնակցելու հանգամանքով։ Հայաստանի իրավիճակն այս տեսանկյունից բավականին առանձնահատուկ է։ Որքան էլ մենք ամեն ինչ դիտարկենք ցանկությունների շրջանակում, Ռուսաստանի գործոնը շատ ազդեցիկ է ու Հայաստանը չի կարող դա հաշվի չառնել։Դրա համար եմ նշում, որ Արևմուտքի հետ հարաբերությունների կառուցումն ու վերափոխումը պետք է շատ ավելի խորքային մակարդակում դիտարկենք ու այդ մակարդակում կատարենք մշակումները, թե ինչպես ենք ու ինչ հողի վրա ենք պատկերացնում այդ հարաբերությունները։ Բայց դա պետք է լինի Հայաստանի արտաքին ու անվտանգային քաղաքականության համար կենսական առաջնահերթություն»։
ՆԱՏՕ-ի հետ համագործակցությունը սերտացնելու անհրաժեշտության մասին մշտապես բարձրաձայնող Ազգային ժողովրդավարական բևեռի ներկայացուցիչ Տիգրան Խզմալյանը «Առաջին լրատվական»-ի հետ զրույցում հանցագործ ու դավաճանական համարեց Հայաստանի Պաշտպանության նախարարության դիրքորոշումը.«Դա արվել է հենց այն նույն օրը, երբ հնչեց Հայաստանում Միացյալ Նահանգների դեսպանի պաշտոնական առաջարկը՝ հայ սպաների համար ուսումնավարժական ու կրթական դասընթացներ կազմակերպել Միացյալ Նահանգների ռազմական վարժարաններում։ Այն պահին, երբ Միացյալ Նահանգների դեսպանն իր կառավարության անունից գալիս է Սյունիք ու հաստատում ԱՄՆ-ի պատրաստակամությունը աջակցել Հայաստանի ինքնիշխանությանը, այդ ֆոնի վրա ակնհայտ ռուսամետ ու հակապետական, հակազգային դրսևորում է նման հայտարարությամբ հանդես գալը»։
Խզմալյանի դիտարկմամբ՝պատահական չէ, որ Միացյալ Նահանգների պաշտոնյաները հանդիպում են ոչ թե Պաշտպանության նախարարի, այլ Գլխավոր շտաբի ղեկավարության հետ.«Մենք փաստորեն ունենք Ազգային անվտանգության ծառայություն, որը ծառայում է Ռուսաստանին, ունենք Պաշտպանության նախարարություն, որը պաշտպանում է Ռուսաստանի շահերը, կառավարություն, որը սպասարկում է ռուս-թուրքական դաշինքը»։
