Թուրքիան շարունակում է քննարկել Stratfor ամերիկյան ընկերության կանխատեսման աղմկահարույց հրապարակումը պետական հեռուստաալիքով, որում ասվում է, որ Անկարան իր ազդեցությունը կընդլայնի Բալկաններում, Հյուսիսային Աֆրիկայում, Մերձավոր Արևելքում, Անդրկովկասում, Կենտրոնական Ասիայում, ինչպես նաև դեպի Ռուսաստանի Կովկաս, Կուբան և Ղրիմ մինչև 2050 թվականը: Հեռուստաալիքը համապատասխան քարտեզ է ցույց տվել, որտեղ այդ տարածքները միավորված են Թուրքիայի հետ նույն գույնով:
Թուրքական Haber7 լրատվական կայքի ընթերցողները տարբեր կերպ են արձագանքել հաղորդագրությանը: Այսպես, նրանցից ոմանք ուրախությամբ են ընդունել տեղեկատվությունը և հայտարարել, որ ազդեցությունը կարող է էլ ավելի նշանակալից լինել. «Աստված տա, Օսմանյան նոր պետություն է ծնվում», «Քարտեզը հոյակապ է», «Ամբողջ աշխարհը կլինի մեր ազդեցության գոտում»:
Մեկնաբանողների մեկ այլ խումբ այստեղ ԱՄՆ-ի կողմից սադրանք է տեսել. «Նպատակը պարզ է. ԱՄՆ-ը ցանկանում է Ռուսաստանը հանել Թուրքիայի դեմ: Դա ակնհայտ է», «Նպատակը մեր թշնամիների թիվն ավելացնելն է», «Սա կատարյալ քարտեզ է Թուրքիային ու Ռուսաստանին իրար դեմ հանելու համար», «Ռուսաստանն ու Թուրքիան պետք է էլ ավելի մտերմանան: Միացյալ Նահանգները կզղջան այս խաղի համար»:
