Ռուսաստանի հայերի միության նախագահ Արա Աբրահամյանը, որ վերջին շրջանում պարբերաբար սուր քննադատում է Հայաստանի իշխանություններին և վարչապետին ու պահանջում վարչապետի հրաժարականը, հերթական գրառումն է արել Ֆեյսբուք սոցիալական ցանցում՝ «պարո՛ն Փաշինյան, ո՞րն է ձեր առջև դրված հաջորդ հակահայկական նպատակը»։
«Համառորեն չցանկանալով հեռանալ՝ դուք ոչ միայն ընդլայնում եք հարցերի շրջանակը, որոնց պատասխանները պետք է տաք ժողովրդի առջև, այլ նաև այդ շրջանակում նոր ֆիգուրանտների եք ներգրավում՝ առաջին հերթին բոլոր նրանց, ովքեր ՀՀ օրենքներին համապատասխան կարող էին կանգնեցնել ձեր հակազգային և հակապետական գործունեությունը, սակայն դա չեն արել և այդպիսով դարձել են մեր ժողովրդի պատմության մեջ մեծագույն ստի և դավաճանության մասնակից»,- գրել է Աբրահամյանը։
«Առաջին լրատվական»-ի հետ զրույցում «Russia-armenia.info» լրատվական կայքի խմբագիր, Հայ-ռուսական կազմակերպությունների համակարգող խորհրդի համանախագահ, հասարակական գործիչ Արամ Խաչատրյանը նշեց, որ Ռուսաստանում հայկական համայնքները դեռ դուրս չեն եկել վատ վիճակից, որում գտնվում են նոյեմբերյան կապիտուլյացիայից հետո, երկրորդ՝ հունվարի 11-ին ևս եղավ եռակողմ հանդիպում Հայաստանի, Ռուսաստանի և Ադրբեջանի ղեկավարների միջև, որի ժամանակ հայտարարություն ընդունվեց, որի հիման վրա Հայաստանը նորից միակողմանի գնաց զիջումների, Ադրբեջանը ստացավ ամեն ինչ, որ պետք է ճանապարհ բացվի Մեղրիով և այլն: Նա նշեց, որ հայկական համայնքի կազմակերպությունները վիրավորված են Հայաստանի իշխանություններից, քանի որ Հայաստանում չեն լսում Սփյուռքի ձայնը, չեն ուզում Սփյուռքի հետ հաշվի նստել, և երբ Ռուսաստանի հայերի միության ղեկավար Արա Աբրահամյանը ելույթ է ունենում, նա ներկայացնում է այն տրամադրությունները, որոնք կան Ռուսաստանի հայկական համայնքում:
«Այսօր Ռուսաստանում Նիկոլ Փաշինյանի դեմ են հանդես գալիս մարդիկ, որոնք միշտ նրա օգտին են հանդես եկել: Օրինակ՝ «Միավորված հայերը» և այլն: Նրանք բոլորը քննադատում են վարչապետին: Վերջերս Փաշինյանը իր ելույթներից մեկում շատ վատ բաներ ասաց Շուշիի մասին՝ նշելով, որ Շուշիի բնակչության 90 տոկոսն ադրբեջանցիներ են եղել: Դա Սփյուռքի համար հարված էր թիկունքից: Դրանից առաջ էլ ասել էր, թե Շուշին գորշ ու դժգույն քաղաք է: Կա՛մ ինքը պատմությունը վատ գիտի, կա՛մ որոշել է խաղալ Ալիևի դաշտում: Պատահական չէ, որ շատ ադրբեջանցի գործիչներ մեջբերում են Փաշինյանին, պաշտպանում նրա խոսքերը, ասում են՝ ճիշտ է ասում: Փաշինյանը երևի չգիտի, որ Շուշին եղել է մեր մշակութային կենտրոններից մեկը: Նա չգիտի, որ 1920 թվականին այդտեղ հայերի ջարդ է եղել, և 20 հազար հայերի են կոտորել: Մի կողմից՝ Ալիևը հայտարարում է, որ Շուշին դառնալու է Ադրբեջանի մշակութային մայրաքաղաքը, թյուրքական աշխարհի մշակութային կենտրոնը, միաժամանակ Փաշինյանը հայտարարում է, որ Շուշին ադրբեջանական քաղաք է: Սա վիրավորանք է հայ ժողովրդի մեծ գրող Մուրացանի, հայտնի կոմպոզիտոր Թարիվերդիևի, ԽՍՀՄ կրկնակի հերոս Նելսոն Ստեփանյանի հասցեին, որոնք արմատներով Շուշիից են: Դրա համար էլ Արա Աբրահամյանն իր ելույթում փաստացի ներկայացնում է ՌԴ հայկական սփյուռքի տրամադրությունները»,- ասաց մեր զրուցակիցը:
Արամ Խաչատրյանը նշեց, որ Ռուսաստանի հայերի համար անհասկանալի են Հայաստանի կառավարության քայլերը, Փաշինյանը կարծես աչք է փակում տեղի ունեցածի վրա, երբ հազարավոր մարդիկ են մահացել, մենք պարտվել ենք:
«Այնպես չէ, որ եկեք այդ էջը փակենք, սկսենք նոր էջից ապրել, աշխատել: Ցավոք, հայ ժողովրդի մեջ հիմա պարտվողական տրամադրություններ են, նույնը նաև՝ Սփյուռքում: Պարզապես պետք է նաև հաշվի առնել, որ այստեղ բազմաթիվ հայեր ու ադրբեջանցիներ են ապրում, որոնք գրեթե ամեն օր առնչվում են իրար հետ: Ընկալումը, որ հայերը պարտվել են, արտահայտվում է ադրբեջանցիների վարքում, և դա մեզ համար շատ վիրավորական է:
Այդուհանդերձ, հայ համայնքը շարունակելու է օգնել Հայաստանին ու Արցախին: Մենք մեծ գումարներ ենք փոխանցել «Հայաստան» հիմնադրամին, բայց այդպես էլ չհասկացանք, թե ինչպես ծախսեցին այդ գումարները: Պարզվեց, որ այդ գումարները տվել են կառավարությանը:
Ռուսաստանի հայ համայնքի 99 տոկոսն ուզում է, որ Նիկոլ Փաշինյանը հեռանա պաշտոնից»,- ասաց նա:
Ինչ վերաբերում է ռազմագերիների վերադարձի խնդրին, Արամ Խաչատրյանն ասաց, որ հայկական համայնքում հարցեր են բարձրացնում, թե ինչու Հայաստանը չկանգնեց նրանց պաշտպանության դիրքերում. «Շատ թույլ փորձեր է անում Փաշինյանի կառավարությունը նրանց վերադարձնելու համար: Մոսկվայում էլ են հասկացել, որ նա շատ թույլ ղեկավար է: Պարտություն կրած ղեկավարը չի կարող միջազգային հանդիպումներում ներկայացնել Հայաստանը:
Վերջերս եղավ ԱՊՀ երկրների ղեկավարների մասնակցությամբ նիստ, որտեղ Ալիևը շուրջ 30 րոպե կարողացավ ներկայացնել իրեն հուզող հարցերը, իսկ Հայաստանի կողմից ոչ ոք չկար: Պարզ է, որ լրատվամիջոցները հայտնեցին, որ Նիկոլ Փաշինյանի հայրն է մահացել, բայց մի՞թե Հայաստանի կառավարությունում չկային փոխվարչապետներ, որոնք կարող էին ներկայացնել Հայաստանը. թեկուզ ԱԺ նախագահը կամ ՀՀ նախագահը ներկայացնեին:
Սա նույնպես մեզ համար վիրավորական էր: Նաև մենք տեսնում ենք, որ Ադրբեջանը մեր ռազմագերիներին ներկայացնում է որպես հանցագործներ: Նրանք արդեն միջազգային հետախուզում են հայտարարել 300 հայերի նկատմամբ:
Քրգործ են հարուցել Հայաստանի նախկին շատ պաշտոնյաների, նախարարների, այդ թվում՝ Սեյրան Օհանյանի նկատմամբ: Հայաստանի կողմից ոչ մի պատասխան քայլ չի արվում: Մենք այսօր զգում ենք հայ համայնքի կտրվածությունը Հայաստանից: Տպավորություն է, որ ՀՀ կառավարությունը որոշել է մեզ վանել իրենից: Նրանք ուզում են մի մեծ ցանկապատ կառուցել Հայաստանի և Ռուսաստանի հայ համայնքի միջև»։
