Հունական կողմը Եվրամիության արտաքին սահմաններն ամրապնդելու նպատակով հզոր պատնեշ է կառուցում Թուրքիայի հետ ցամաքային սահմանին՝ Էվրոս սահմանամերձ մարզում: Այս մասին ճեպազրույցում ասել է Հունաստանի կառավարության պաշտոնական ներկայացուցիչ Ստելիոս Պեցասը:
«Ներկայումս սահմանին 26 կմ երկարությամբ նոր պարիսպ է կառուցվում, և արդիականացվում են հին՝ 10 կմ երկարությամբ հատվածները: Ակնհայտ է, որ նոր ցանկապատի ստեղծումը նպաստում է երկրի ինքնիշխան իրավունքների պաշտպանությանը և բոլորին հստակ ազդանշան է տալիս, որ Հունաստանը պաշտպանում է Եվրոպայի արտաքին սահմանները»,- ասել է Պեցասը:
Պեցասը նաև հաղորդել է, որ Հունաստանի սահմաններն առավել արդյունավետ պաշտպանելու համար 400 նոր մշտական սահմանապահներ անմիջապես կսկսեն հերթապահել Էվրոսում, ևս 800-ը կտեղակայվեն Էգեյան ծովի արևելյան մասում գտնվող կղզիներում, 480-ը՝ երկրի մնացած հատվածում: «Տարվա ընթացքում ընդհանուր առմամբ 1680 սահմանապահ կտեղակայվի բոլոր այն տարածքներում, որտեղ ոստիկանության ուժեղ ներկայություն է պահանջվում»,- ասել է կառավարության ներկայացուցիչը:
