Երևանում այժմ գործում են թաղումների և սգո այլ արարողությունների կազմակերպմամբ զբաղվող ծառայություններ։ Ստեղծված մրցակցային պայմաններում կազմակերպությունները շուկայում առաջ անցնելու համար ներկայացնում են բազմազան հավելյալ ծառայությունների փաթեթներ ևս։ Երևանում անցկացվում է օրական 15-20 սգո արարողություն։ Կան ընկերություններ, որոնք առաջարկում են բոլոր ծառայությունները, սակայն կան կազմակերպություններ, որ ուղղորդում են հաճախորդներին և տալիս, օրինակ, երաժիշտների, թաղման տեղը պատրաստողների, դին տեղափոխելու և այլ ծառայություններ իրականացնողների հեռախոսահամարներ։
Ինչպես «Առաջին լրատվականին» հայտնեց «Պասիֆլորա» ընկերության ներկայացուցիչը, իրենց առաջարկած փաթեթի գինը սկսում է 45,000 դրամից։ Փաթեթը իր մեջ ներառում է դագաղի պատվանդան, սև ծածկոցներ, ծաղկային կոմպոզիցիա և երկու մոմեր:
Անկախ այն բանից, թե որ ընկերությանն են դիմում, պետք է նախ դիմել Թաղման բյուրո՝ թաղման համար տեղ ստանալու համար։ Գերեզմանի փոսը փորելու համար թաղման բյուրոն կպահանջի 26,500 դրամ։ Ամեն մարդու հասնում է 12 քառակուսի մետր տարածք։
Երևանի թաղման բյուրոյի ներկայացուցիչ Ռազմիկ Հարությունյանի խոսքով, ամեն նվագողի մեկ ժամվա ծառայությունն արժե 8000 դրամ։ Այժմ քանի որ մասնավոր ընկերությունները շատացել են, թաղման բյուրոյի աշխատակից երաժիշտները այլևս չեն աշխատում։ Բյուրոն առաջարկում է, որ դիերը գերեզմանատուն տանելու համար հատկացվեն հատուկ մեքենաներ։ Այժմ մասնավոր կազմակերպություններն առաջարկում են տարբեր մեքենաներ՝ սովետական հին մեքենաներից մինչև թանկարժեք «Կադիլակ» ու «Մերսեդես» և այլ մեքենաներ, որոնց գնային տարբերությունը տարբեր է։
