Ժողովրդագրական տեսանկյունից կորոնավիրուսի հասցրած վնասները դեռ երկար կզգացվեն։ Իրավիճակը ավելի հստակ կարելի կլինի գնահատել հաջորդ տարի։ Այդ մասին «Առաջին լրատվական»-ի հետ զրույցում ասաց աշխատանքի և սոցիալական հարցերի նախարարության ժողովրդագրության բաժնի պետի Արտակ Մարկոսյանը։
«Դեռ վաղ է գնահատել կոնկրետ ժողովրդագրության վրա կորոնավիրուսի ազդեցությունը, որովհետև սա ոչ միայն առողջապահական խնդիր է, այլև տնտեսական բացասական հետևանքներ է ունենալու։ Ժողովրդագրության համար դեռևս ժամանակ է հարկավոր։ Հաջորդ տարի կարելի է խոսել, թե ինչ ազդեցություն են ունեցել տնտեսական բացասական հետևանքները ժողովրդագրության վրա»,- ասաց Արտակ Մարկոսյանը։
Հաշվի առնելով այն, որ կորոնավիրուսային իրավիճակով պայմանավորված՝ տնտեսական լուրջ խնդիրներ կառաջանան, չի բացառվում նաև, որ այդ գործոնները կազդեն նաև բնական աճի տեմպերի վրա։ «Տնտեսագիտական տեսանկյունից եթե խոսենք, ապա կարող ենք ասել, որ սրա հետևանքները ոչ մեկ ամսում են վերանալու, ոչ մեկ տարում։ Մենք նախորդ տարի ունեինք բավական լավ պատուհան։ Մեծ թվով 80-ականների կեսի 90-ականների սկզբի ծնվածներ, որոնք պետք է մտնեին ամուսնական դաշտ։ Ինչ-ինչ պատճառներով մարդիկ չէին ամուսնացել։ 2010 թվականից մեզ մոտ ամուսնությունների թիվը նվազել էր։ Պետք է տեղի ունենար հակառակ գործընթացը, պետք է աճեր։ Ուսումնասիրությունները ցույց են տվել, որ, բացի տնտեսական խնդիրներից, այն պայմանավորված էր նաև նրանով, որ երիտասարդներն իրենց Հայաստանում չէին տեսնում։ Հետազոտություններ կային, համաձայն որոնց՝ մինչև 53 տոկոսը ցանկանում էր հեռանալ Հայաստանից»,- ասաց Արտակ Մարկոսյանը։
Նա հույս հայտնեց, որ մեկնարկող ժողովրդագրական ծրագրերի առումով ունենալու ենք բնական աճ։ Կառավարությունը մի շարք ծրագրեր է նախատեսում իրականացնել բնական աճը երկրում խթանելու ուղղությամբ։ Ծրագրերը, որոնք պետք է ուժի մեջ մտնեին հաջորդ տարվանից, պայմանավորված կորոնավիրուսային իրավիճակով ու տնտեսական լուրջ հետևանքներով, սկսելու է գործել այս տարվանից։
Խոսելով միգրացիոն վիճակի մասին, ժողովրդագրության բաժնի պետը ներկայացրեց 2020 թվականի առաջին եռամսյակի միգրացիոն պատկերը։ Ըստ այդմ՝ հայկական անձնագրով ելումուտը դրական է եղել 18609-ով, նախորդ տարվա 2526-ի փոխարեն։ Այսինքն՝ ՀՀ անձնագրով ավելի շատ մարդ է մուտք գործել երկիր, քան դուրս է եկել։ Պատճառները տարբեր են։ «Օրինակ՝ Ռուսաստանի Դաշնությունում ևս խնդիրներ են առաջացել։ Այնտեղ գտնվող մեր հայրենակիցների համար բավականին դժվար ժամանակահատված է։ Ես չեմ խոսում 20, 30 կամ 35 տարի առաջ գնացածների մասին, այլ՝ 5-6։ Իրենք լուրջ խնդիրներ ունեն, այդ թվում՝ բնակվարձի։ Մարդիկ նախընտրում են վերադառնալ Հայաստան։ Ոչ միայն Ռուսաստանից են վերադառնում, նաև Ամերիկայից են վերադառնում։ Եվրոպական երկրներից դեռ չեմ լսել, բայց, հավանաբար, դեռ փակ են սահմանները՝ դրանով է պայմանավորված։ Սահմանների բացվելուց հետո կերևա, թե եվրոպական երկրներից հոսքերը ինչպիսին են։ Մենք ներհոսք ունենալու ենք։ Նաև պետք է հաշվի առնել, որ այս տարի արտագնա աշխատանքի չեն մեկնել։ Այդ տեսանկյունից, մեզ համար դրական է։ Իսկ արտահոսք այս պարագայում ես չեմ կանխատեսում»,- ամփոփեց իր խոսքը Արտակ Մարկոսյանը։
