Ռուսաստանի ԱԳ նախարար Սերգեյ Լավրովն իր խոսքում նշում է, որ գազի գնի շուրջ քննարկումներ լինելու են, ուղղակի նաև հակափաստարկներ է բերում, որ եղել են ժամանակներ, որ միջազգային գների և Հայաստանի սահմանին գազի գների միջև խզումը եղել է Հայաստանի օգտին: Այս մասին «Առաջին լրատվական»-ի հետ զրույցում նշեց ԱԺ «Իմ քայլը» խմբակցության պատգամավոր Արտակ Մանուկյանը:
«Հիմա եթե դիտարկենք միջազգային շուկան, հատկապես այն երկրները, որոնք նավթամթերքների զամբյուղին են ամրակցել, և նավթի գների նվազում է տեղի ունենում, ակնհայտ է, որ զամբյուղի արժեքը նվազում է և Հայաստանին մատակարարվող գազի գնի և միջազգային գների մասով, ըստ էության, կարող են լինել երկրներ, որոնք գրեթե նույն չափով են գազի մատակարարում ստանում»,-ասաց նա:
«Իմ քայլի» պատգամավորը նաեւ հավելեց, որ հիմա բանակցություններ են ընթանում հենց սահմանին գազի գնի նվազման շուրջ՝ պայմանավորված մի քանի իրողություններով» «Առաջինը միջազգային կոնյուկտուրայի առկայությունն է, մասնավորապես, տաք ձմեռով պայմանավորված գազի պահանջարկը որոշակի առումով նվազեցված էր, ինչն էլ իր հերթին որոշակի ազդեցություն ուներ գնագոյացման մեխանիզմների վրա: Հիմա ամեն երկիր իր շահն է բանակցություններում դնում, բայց մենք ունենք մի մոտեցում՝ միասնական էներգետիկ շուկայի գաղափարը: Այսինքն ոչ թե նույն տարածքի երկրներից մեկը մրցակցային առավելություն ունենա մյուսների նկատմամբ, այլ ողջ տարածքը մրցակցային առավելություն ունենա երրորդ երկրների նկատմամբ»,-ասաց Արտակ Մանուկյանը:
