Ինչ հետագիծ է թողել համաճարակը մարզերում, ինչպես են աշխատում մարզպետարաններն արտակարգ դրության պայմաններում, ինչ քայլերով են իրականացվում կառավարության աջակցության ծրագրերը՝ հաշվի առնելով այն, որ խոցելի խմբերը մարզերում ավելի շատ են, քան մայրաքաղաքում:
Թեմայի շուրջ «Առաջին լրատվական»-ի հետ քննարկմանը մասնակցեցին Տավուշի մարզի մարզպետ Հայկ Չոբանյանը և Արագածոտնի մարզպետ Դավիթ Գևորգյանը:
«Տավուշի մարզը բավականին ամուր է դիմագրավում առկա մարտահրավերները: Ընդհանուր առմամբ մարզում իրավիճակը կայուն է, ունենք 8 վարակակիր, որոնք գտնվում են համապատասխան բժշկական հաստատություններում: Մարզի բնակիչներն օրեցօր ինտեգրվում են աշխատանքային պրոցեսին: Մարզում նույնպես սահմանափակումները պահպանվում են, բայց գյուղատնտեսական առօրյա աշխատանքները շարունակվում են: Անցյալ շաբաթ ևս որոշ ոլորտներից սահմանափակումները հանվեցին՝ մասնավորապես շինարարության ոլորտում. մեր մարզում վերագործարկվել և իրականացվում են և պետական և մասնավոր շինարարական ծրագրեր, այդ թվում նաև ճանապարհաշինարարական: Փորձում ենք աշխատանքային միջավայրում պահպանել բոլոր կանոնները՝ սոցիալական հեռավորության և այլն: Մեր մարզի բնակչությունը բավականին բարձր կարգապահություն է դրսևորում»,- նշեց Հայկ Չոբանյանը՝ հավելելով, որ Բագրատաշեն-Պտղավան հատվածում օրական բեռնատարների 200-ից ավելի ելք և մուտք է լինում, բեռնատարների վարորդներն անցնում են համապատասխան զննություն և մեքենաներն ախտահանվում են:
Դավիթ Գևորգյանի տեղեկացմամբ՝ Արագածոտնի մարզում գրանցվել է կորոնավիրուսի վարակի 31 հաստատված դեպք, մահ չի գրանցվել, վարակակիրներից 19-ը բուժվել են և վերադարձել իրենց մշտական բնակության վայրեր, մյուսները շարունակում են բուժվել: Մարզի կտրվածքով դինամիկան լավատեսական է:
«Մարզային ելքերն ու մուտքերը վերահսկվում են ոստիկանների կողմից: Կարծում եմ՝ մենք գտել ենք կորոնավիրուսի դեմ պայքարի ճիշտ բալանսը»,- նշեց Դավիթ Գևորգյանը:
Հայկ Չոբանյանը վստահեցրեց, որ տնտեսական զարգացման ծրագրերում մարզերը երբեք այսչափ ներգրավված չեն եղել, և հավելեց, որ մարզերում աշխատանքի մեծ ճակատ կա:
Մանրամասն՝ տեսանյութում:
