Գրեթե մեկ ամիս է, ինչ տեղի չի ունենում 2008թ․ մարտի 1-ին սահմանադրական կարգը տապալելու մեղադրանքով անազատության մեջ գտնվող ՀՀ երկրորդ նախագահ Ռոբերտ Քոչարյանի և մյուսների դատավարությունը։
Հիշեցնենք, որ Հայաստանի նախկին վարչապետներ Վազգեն Մանուկյանը, Խոսրով Հարությունյանը, Կարեն Կարապետյանը և Արցախի նախկին վարչապետ Անուշավան Դանիելյանը միջնորդություն էին ներկայացրել դատարան, որպեսզի փոխեն Ռոբերտ Քոչարյանի խափանման միջոցը՝ կալանքը։ Մարտի 17-ին դատարանը պետք է քննարկեր այդ միջնորդությունը, սակայն գործը քննող դատավոր Աննա Դանիբեկյանի վիրահատության պատճառով դատական նիստը չկայացավ։
ՀՀ Բարձրագույն դատական խորհրդի մամուլի և հասարակայնության հետ կապերի վարչության պետ Արման Խաչատրյանը «Առաջին լրատվական»-ի հետ զրույցում տեղեկացրեց, որ իրենք հրապարակել են այն տեղեկությունը, որ դատավոր Աննա Դանիբեկյանի անաշխատունակության ժամկետը լրանում է ապրիլի 16-ին, և ապրիլի 17-ին նա պետք է ներկայանա աշխատանքի, եթե բժիշկը չերկարաձգի նրա ժամանակավոր անաշխատունակության ժամկետը։
Թե երբ կկայանա հերթական նիստը՝ Արման Խաչատրյանը պարզաբանեց, որ նիստի օրը որոշելը բացառապես դատավորի իրավասության շրջանակներում է։
Հետաքրքրվեցինք, թե ԲԴԽ-ն կապ հաստատե՞լ է Աննա Դանիբեկյանի հետ, տեղյա՞կ է նրա առողջական վիճակի մասին, ապրիլի 17-ին նա կներկայանա՞ աշխատանքի։
«Ես անձամբ կապ չեմ հաստատել, իմ իրավասություններից դա դուրս է։ Ունեմ Երևանի ընդհանուր իրավասության դատարանում առկա տեղեկատվությունը, դատարանը վստահաբար կապ է ունեցել դատավորի հետ և տեղեկացված է նրա անաշխատունակության թերթիկի ժամկետի մասին»,- ասաց Արման Խաչատրյանը։
Փաստաբան, «Հանրապետություն» կուսակցության քաղխորհրդի անդամ Նորիկ Եղիազարյանից հետաքրքրվեցինք, թե որն է դատավորի՝ աշխատանքի չներկայանալու ողջամիտ ժամկետը, հնարավո՞ր է, որ անաշխատունակության պատճառով գործը մակագրվի այլ դատավորի, ինչը կարող է շահեկան լինել Ռոբերտ Քոչարյանի պաշտպանական թիմի համար։
«Եթե լինում են խոչընդոտներ, որոնց պատճառով գործի քննությունը կարող է ձգձգվել, չկայանալ և այլն, ապա դատարանի նախագահի որոշմամբ՝ գործի քննությունը կարող է հանձնվել մեկ այլ դատավորի։ Այս դեպքում, սակայն, ամբողջ գործի քննությունը սկսվում է սկզբից։ Եթե դատավորը փոխվում է, գործի քննությունը սկսվում է նորից։ Չեմ կարծում, թե Դանիբեկյանին կփոխարինեն մեկ ուրիշով, նա հավանաբար կներկայանա աշխատանքի։ Ռոբերտ Քոչարյանի փաստաբանները շահագրգիռ մարդիկ են, որոնք մի փոքր բան են գտնում, որպեսզի վարկաբեկեն դատաքննությունը»,- «Առաջին լրատվական»-ի հետ զրույցում ասաց փաստաբանը։
Մարտի 1-ի գործով տուժողների փաստաբան, Փաստահավաք խմբի նախկին անդամ Սեդա Սաֆարյանը մեզ հետ զրույցում նշեց, որ, իր տեղեկություններով՝ դատավորը ապրիլի 17-ին կներկայանա աշխատանքի։
«Եթե երկար ժամանակ դատավորը չներկայանա աշխատանքի, կարող է գործը մակագրվել այլ դատավորի, այդպես անվերջ չի կարող դատական նիստը հետաձգվել։ Այս առումով կա մտավախություն։ Աննա Դանիբեկյանը հասցրել է վեց ամսվա ընթացքում երկու միջնորդություն քննարկել։ Եթե գա նոր դատավոր, նա պետք է հասցնի բոլոր միջնորդությունները քննել։ Կարծում եմ՝ լուրջ խնդիր չկա, և դատավորը կարող է ներկայանալ աշխատանքի»,- ասաց Սեդա Սաֆարյանը։
Լուսանկարը՝ Armeniasputnik-ի
