Թուրքական Doğan լրատվական գործակալության հաղորդմամբ՝ Թուրքիայի վարչապետ Ռեջեփ Էրդողանը Կիպրական խաղաղության շարժման 37-ամյա տարեդարձի կապակցությամբ այցելել է այսպես կոչված Հյուսիսային Կիպրոսի թուրքական հանրապետություն (ՀԿԹՀ)։ Էրդողանին դիմավորել է ՀԿԹՀ նախագահ Դերվիշ Էրօղլուն։
Էրդողանը հավաքված կիպրացի թուրքերին հայտարարել է, թե Կիպրոս անվանմամբ պետություն «գոյություն չունի». «Ներկայումս «գոյություն» ունի Հարավային Կիպրոսի հունական պետություն և ՀԿԹՀ։ Սիրելի՛ եղբայրներ, մի՛ մոռացեք, որ մենք միասնակամ ենք, միասին ենք, մեկ սիրտ ենք։ Ձեզ հայրենիքից ողջույններ եմ բերել։
ՀԿԹՀ-ն կարճատև ժամանակում վերածվելու է ազդեցիկ ուժի։ Մարտ ամսին տեղի ունեցավ Թուրքիայից ՀԿԹՀ խմելու ջրի խողովակաշարի կառուցման հիմնարկեքը։ Այդ նախագիծը մենք կավարտենք 3 տարվա ընթացքում4 և դրանով լիովին կլուծվի խմելու ջրի խնդիրը։ ՀԿԹՀ-ն արդեն էլեկտրաէներգիայի հետ կապված խնդիրներ չունի»։
Հիշեցնենք, որ կիպրական խնդիրը շարունակում է չլուծված մնալ 1974 թվականից, երբ Հյուսիսային Կիպրոս ներխուժեցին թուրքական զորքերն ու գրավեցին Կիպրոսի տարածքի 37 տոկոսը (3355 քառակուսի կիլոմետր), ինչը թուրքական կողմն անվանում է «Խաղաղության շարժում»:
Ի դեպ, ողջ աշխարհում միայն Թուրքիան է ճանաչել ՀԿԹՀ-ի անկախությունը, իսկ Ադրբեջանը Լեռնային Ղարաբաղի պատճառով զրկված է այդ գայթակղությունից: Փոխարենը, այդպիսի քայլի է գնացել Նախիջևանի ինքնավար հանրապետությունը (ՆԻՀ)։
Ժամանակին ՀԿԹՀ-ի անկախության ճանաչման վերաբերյալ փորձ են ձեռնարկել Պակիստանը և Բանգլադեշը, սակայն գործադրված ճնշումների արդյունքում հրաժարվել են դրանից։
