Մամուլում տեղեկություն կա, որ վարչապետի պաշտոնում Հովիկ Աբրահամյանի նշանակումը կարող է ոչ դրական ազդեցություն ունենալ Տարոն Մարգարյանի պաշտոնավարման վրա, և որ Հովիկ Արգամիչի թիմը սկսել է նրա դեմ աշխատել: Այս առթիվ «Առաջին լրատվական»-ի հարցին ի պատասխան՝ Երևանի փոխքաղաքապետ Դավիթ Օհանյանը այսօր հրավիրված ասուլիսում հայտարարեց. «Ես վստահ ու համոզված եմ, որ մենք թիմ ենք, և մեր թիմակից ընկերոջ նշանակումը չի կարող վատ ազդեցություն ունենալ»:
Մեր դիտարկմանը՝ այսօր փաստ է, որ նույն թիմի մարդիկ՝ նախարարներ, փոխնախարարներ, պիտի լքեն իրենց պաշտոնները, Օհանյանը հակադարձեց. «Ի՞նչ է նշանակում՝ պիտի, օրը կգա, բարին հետը»:
Քանի որ Դավիթ Օհանյանը, ով նախկինում եղել է Մալաթիա-Սեբաստիա համայնքի թաղապետը, համարվում է ՀՀԿ խմբակցության պատգամավոր, գործարար Սամվել Ալեքսանյանի մտերիմն ու հովանավորյալը, նրան հիշեցրինք, որ Փակ շուկայի սեփականատերը թեև խոստանում էր տարածքը մաքրել առնետներից, սակայն կրկին ահազանգեր կան, որ շուկայի շրջակայքում առնետներ են վխտում: «Կարող ա երկոտանի առնետներն են շատացել, բայց չորսոտանի առնետները էնտեղ ընդհանրապես վերացել են»,- հայտարարեց Օհանյանը:
Հիշեցնենք, որ «Առաջին լրատվական»-ը վերջերս նկարահանումներ էր կատարել տարածքում՝ ֆիքսելով շուկայի շրջակայքում շինարարական աղբը, կիսաքանդ փողոցներն ու առնետները:
