ՀՀ Կենտրոնական բանկի նախկին նախագահ, տնտեսագետ Բագրատ Ասատրյանը 2020 թվականի պետական բյուջեն ի տարբերություն վարչապետ Նիկոլ Փաշինյանի բնութագրում է ոչ թե պահպանողական, այլ խիստ պահպանողական։
«Մենք ունենք բյուջեի եկամուտների զգալի աճ, ծրագրով նախատեսվածից շատ ավելի բարձր արդյունքներ, սակայն չունենք համարժեք ծախսերի կատարում։ Այս տասը ամիսների դրությամբ էլ արդեն ակնհայտ է, որ 2019թ-ի ավարտին մոտ 10-15 տոկոսով գերակատարվելու է պետական բյուջեի մասով եկամուտների ծրագիրը, մինչդեռ ծախսերի կատարման ծրագիրը թերակատարման վտանգի առաջ է, այսինքն՝ այդ ավելցուկը չի ծախսելու կառավարությունը, որը խիստ վտանգավոր երևույթ է։
Այսօր մեր երկրում հետկոռուպցիոն մի շրջան է, որտեղ իշխող դիրքում վախվորածությունն է, որևէ մակարդակում ծախսային վճիռ կայացնողը խուսափում է այդ գումարները բաշխելուց, խուսափում են վճռականությունից, իսկ դա շատ բացասական է, որովհետև՝ այո´, փողը կա, բայց ոլորտների պատասխանատուները մտածում են՝ գործ չունենք, բա որ հանկարծ մի բան ճիշտ չանենք, ավելի լավ է՝ թող մնա։ Սա շատ սխալ մոտեցում է, խստագույն հսկողություն է պետք իրականացնել, վճռականություն է պետք ցուցաբերել»,- «Առաջին լրատվական»-ի հետ զրույցում նկատեց Բագրատ Ասատրյանը։
Վերջինիս գնահատմամբ՝ տարեվերջին նախատեսված 5 տոկոս տնտեսական աճի փոխարեն ունենալու ենք շուրջ 7 տոկոս տնտեսական աճ։ Ասատրյանի խոսքերով՝ սա, միանշանակ, դրական է, սակայն միևնույն ժամանակ բավարար չէ, քանզի պոտենցիալը շատ ավելի մեծ է, իսկ հավաքագրված եկամուտները ծախսելու տեսանկյունից՝ գործադրվող քայլերը խիստ զգուշավոր ու ոչ այնքան արդյունավետ։
Մանրամասները՝ տեսանյութում։