Բրիտանացի դերասան Թոմ Հոլանդը, որը հայտնի է Սարդ-մարդու դերով Marvel Studio-ի ֆիլմերի շարքում, աջակցել է իր հերոսին գեյ դարձնելու գաղափարը, հաղորդում է The Huffington Post-ը:
Հոլանդը նշել է, որ չի կարող խոսել իր հերոսի ապագայի մասին, քանի որ այդպիսի մանրամասների չի տիրապետում, և կերպարի զարգացումն իրենից կախված չէ: Դերասանը հավելել է, որ առաջիկա մի քանի տարիների ընթացքում Marvel-ը մտադիր է իր ֆիլմերում մի շարք նոր կերպարներ ավելացնել: «Աշխարհն այդքան պարզ չէ, ինչպես մի ինչ-որ հետերոսեքսուալ սպիտակ տղա»,- ընդգծել է նա:
Դերասանը նկարահանվել է Սարդ-մարդ մականունի տակ թաքնվող պատանի գերհերոս Փիթեր Փարքերի դերում «Առաջին վրիժառուն. առճակատում», «Սարդ-մարդը. վերադարձ տուն», «Վրիժառուները. անվերջության պատերազմ», «Վրիժառուները. եզրափակիչ» և «Սարդ-մարդը. տնից հեռու» ֆիլմերում:
