Երբ 19-ամյա Մարկոս Ռոդրիգես Պանտոհայի առջև առաջին անգամ ափսեով ճաշ է դրվել, նա չի իմացել` ինչ պետք է անել, իսկ մի քանի շարժումներից հետո ափսեն ընկել ու կոտրվել է, գրում է BBC-ն:
Բանն այն է, որ երբ Մարկոսը 6 տարեկան է եղել, հայրը նրան վաճառել է մի տարեց իսպանացու, որը այծերի հովիվ էր: Նրա մահից հետո տղան մնացել է խորթ մոր խնամքին: Վերջինս մշտապես ծեծել է նրան: Որոշ ժամանակ անց տղան փախել է սարերը:
«Ես սկսեցի սովորել կենդանիներից, նրանք իմ ուսուցիչները դարձան: Ես ուտում էի այն ամենը, ինչ նրանք էին ուտում, խմում նույն ջուրը: Մի օր ես քարանձավ գնացի և խաղալով գայլի ձագերի հետ` քնեցի: Երբ կրկին բացեցի աչքերս, տեսա նրանց մորը, որը գայլուկներին ուտելիք էր բերել: Ես փորձեցի գողանալ գայլուկի միսը, սակայն նրա մայրն ինձ թաթով հարվածեց, և ես հետ քաշվեցի: Սակայն երբ նրա ձագերը կշտացան, նա մսի մի կտոր էլ ինձ տվեց: Ես չէի համարձակվում կրկնել փորձը, սակայն մայր գայլը շարունակում էր միսը դեպի ինձ հրել, և ես կերա այն: Հետո նա լիզեց ինձ, և այդ պահից ի վեր ես դարձա նրանց ընտանիքի անդամ»,- հիշում է Մարկոսը:
Մարկոսը վայրի բնության մեջ ապրել է 12 տարի, որից հետո նրան հայտնաբերել են Ազգային գվարդիայի զինվորները:
Մարկոսի համար սարսափելի էր հասարակություն վերադարձը` նա վախից քարացել է, երբ տեսել է վարսավիրին` մկրատը ձեռքին, իսկ նրան նորմալ հագնվել և մահճակալին քնել սովորեցրել են վանականները:
