Երեկ ՀՊՃՀ ռեկտոր Արա Ավետիսյանը ներկայացրել է աշխատանքից ազատվելու դիմում: ՀՀ ԿԳ նախարարի հրամանով ԵՊՃՇՀ ռեկտոր Հովհաննես Թոքմաջյանի լիազորությունները դադարեցվել են և նրա վրա են դրվել ՀՊՃՀ ռեկտորի պարտականությունները:
Այսօր ՀՀ կրթության և գիտության նախարար Արմեն Աշոտյանը այցելել էր Երևանի պետական բժշկական համալսարանի Հերացի թիվ 1 համալսարանական հիվանդանոց՝ շրջելու նոր վերակառուցված բաժանմունքներում և ծանոթանալու կատարված աշխատանքներին:
Լրագրողները նախարարից հետաքրքրվեցին Արա Ավետիսյանի ազատման պատճառների մասին:
«Դուք ակտիվորեն հետևում եք բուհական համակարգի վերջին զարգացումներին, շատ լավ գիտեք, որ տարբեր բուհերում տարբեր խնդիրներ են լինում, մենք որևէ սենսացիա այս փաստի մեջ չենք փնտրում և ձեզ էլ խնդրում ենք չփնտրել:
Նախկին ռեկտորը, ըստ ամենայնի, որոշել է բուհի հետագա զարգացման համար բազմակարծության պայմաններում ստեղծել նոր հնարավորություններ՝ այս ցանկությունները վերածելու համար աշխատանքի»,- ասաց Արման Աշոտյանը՝ հավելելով, որ նախկին ռեկտորը մնում է ԿԳ համակարգում, նա նաև ԳԱԱ անդամ է, դասավանդում է ԵՊՀ-ում, և որևէ խնդիր չկա:
Խոսակցություններն այն մասին, թե սա կարող է կապված այն բանի հետ, որ Արա Ավետիսյանը չկարողացավ կանխել «Դեմ եմ»-ի ակցիան Պոլիտեխնիկում, նախարարը նշեց, որ դեռ շատ շահարկումներ կլինեն, ավելին՝ «Դեմ եմ»-ի ակցիան անցել է զուսպ և հանգիստ, չի խանգարել կրթական գործընթացին: Եվ այս դիտանկյունից արդեն նախկին ռեկտորից որևէ դժգոհություն չի եղել:
«Ըստ ամենայնի՝ ձեզ հետ միասին մենք ականատես կլինենք բուհական համակարգում նախարարության կողմից առավել կտրուկ, ուշադիր և կոշտ քայլերի հերթականության, որպեսզի կարողանանք թռիչքաձև զարգացում ապահովել տարբեր բուհերում: Պոլիտեխնիկի ներսում նախկինում եղած որոշ տարաձայնություններ և խժդժություններ պետք է շատ արագ հարթվեն և բացարձակապես չազդեն բուհի հետագա զարգացման վրա»,- ասաց նախարարը՝ հավելելով, որ պետք է շարունակել աշխատանքները՝ Պոլիտեխնիկին վերադարձնելու իր ամբողջական փառքն ու հնչեղությունը:
Նա նաև նշեց, որ Ճարտարապետաշինարարականի ռեկտորի պաշտոնն այս պահին թափուր է, ժամանակավոր պաշտոնակատար է նշանակվել պրոռեկտորներից մեկը:
«Գուցե Պոլիտեխնիկը և Ճարտարապետաշինարարականը մոտ ապագայում վերամիավորվեն, ինչպես դա եղել է Խորհրդային Հայաստանի ժամանակ, և մենք կունենանք ավելի մեծ միասնական Պոլիտեխնիկ, ինչպես դա եղել է քսան տարի առաջ: Այս ռեկտորի փոփոխությամբ կտանենք միասնական քաղաքականություն երբեմնի միասնական կրթական հաստատության մեջ գործող ֆակուլտետների վերամիավորման հետ կապված, ինչը շատ դրական ազդեցություն կունենա բուհի զարգացման վրա, և կարծում եմ՝ մոտ ապագայում մենք այդ քայլերը կձեռնարկենք»,- ասաց նախարարը:
Մանրամասները՝ տեսանյութում:
