Սյունիքի մարզի ընդհանուր իրավասության դատարանում Նապոլեոն Օհանյանի նախագահությամբ սկսվել ու ավարտվել է Դավիթ Մկրտումյանի գործի դատական քննությունը:
Ըստ դատական ակտի՝ Սյունիքի մարզի Ճակատեն գյուղի 31-ամյա բնակիչ Դավիթ Մկրտումյանը 2014 թվականի հունվարի 8-ին, գիշերվա ժամը 1-ին ոգելից խմիչք օգտագործած վիճակում վնասվածք է ստացել ու գնացել Կապանի բժշկական կենտրոնի վնասվածքաբանական բաժանմունք՝ բուժօգնություն ստանալու:
Բաժանմունքում նա բարձրաձայն խոսել է հեռախոսով: Բուժաշխատողները նրան դիտողություն են արել, որ խանգարում է հիվանդների հանգիստը և իրենց աշխատանքը:
Դավիթը վրդովվել է ստացած դիտողությունից, բարձրաձայն հայհոյանքներ տվել, ոտքերով հարվածել մասնաշենքի մուտքի դռան ապակուն՝ պատճառելով 5950 դրամի գույքային վնաս, հարվածել է նաև շտապօգնության մեքենային:
Դավիթ Մկրտումյանն ընդհանուր իրավասության դատարանում իրեն լիովին մեղավոր է ճանաչել խուլիգանության համար՝ ՀՀ քրեական օրենսգրքի 258 հոդվածի 2-րդ մասով: Գործը քննվել է արագացված ընթացակարգով:
Դատարանը հաշվի է առել, որ Դավիթ Մկրտումյանը հանցավոր արարքը կատարել է թեթև աստիճանի խմածության վիճակում, նրա խնամքին է 6-ամյա դուստրը: Ընդ որում՝ դեպքի օրը՝ հունվարի 8-ը, հենց Դավիթի դստեր ծննդյան օրն էր…
Դատարանը պատիժ նշանակելիս նկատի է առել նաև, որ ամբաստանյալը հատուցել է բժշկական կենտրոնին պատճառած գույքային վնասը, անկեղծորեն զղջացել է կատարածի համար, բարձրագույն կրթությամբ երիտասարդ է, նախկինում դատապարտված չի եղել:
Կատարած խուլիգանության համար Դավիթ Մկրտումյանը դատապարտվել է 120 հազար դրամ տուգանքի:
