Այսօր՝ մայիսի 31-ին, Ազգային ժողովում շարունակվում են աշխատանքները: Այժմ քննարկվում է Տնտեսական մրցակցության պաշտպանության պետական հանձնաժողովի անդամի ընտրության հարցը: Այդ պաշտոնում վարչապետն առաջարկել է Արեն Դանիելյանի թեկնածությունը՝ 3 տարի ժամկետով:
«Իմ քայլը» խմբակցության պատգամավոր Հովհաննես Հովհաննիսյանը, անդրադառնալով «Լուսավոր Հայաստան» խմբակցության ղեկավար Էդմոն Մարուքյանի ելույթին, հայտարարեց. «Պարոն Մարուքյան, դուք պետք է ծանոթ լինեիք բուհերի խորհուրդների ձևավորման կարգին, որը հաստատվել է 2005 թվականի հուլիսի 18-ին կառավարության որոշմամբ»:
Նրա խոսքով՝ խորհուրդներում տարբեր գործիչների առկայությունը չի ենթադրում քաղաքականացում: Նա նշեց բազմաթիվ բուհերի անուններ՝ ասելով, որ դրանց խորհրդի նախագահները կուսակցական չեն. «Սա չտեսնել և ասել՝ նույն ՀՀԿ-ական բանն եք անում՝ անբարոյականություն է»:
Հովհաննես Հովհաննիսյանը հավելեց՝ ի՞նչ ասել է խցկվել խորհրդի կազմում. «Ձեր եղբորը չենք խցկել, առաջարկել ենք: Կա՛մ լսողության, կա՛մ տրամաբանության խնդիր կա՝ ուրիշ խնդիր չկա»:
Նա նաև հետաքրքրվեց, թե ինչու է Մարուքյանը հետաքրքրված ԵՊՀ-ով և Ագրարային համալսարանով. «Որովհետև մեկը ձեր ընկերն էր», և արձագանքելով Մարուքյանի խոսքին՝ ասաց. «Ավելի վատ, որ ընկեր չունեք»:
Նա առաջարկեց քննարկել լուրջ հարցեր՝ կապված օրենքի, ինքնավարության սկզբունքների հետ:
Մանրամասները՝ տեսանյութում:
