«Լրատվամիջոցները երբեմն բարձրացնում են «լվացքատնային» հարցեր. մամուլի ասուլիսում չլսվեցին կարևոր հարցեր»,- այս ամսին «Առաջին լրատվական»-ի հետ զրույցում ասաց պատմաբան Վահրամ Թոքմաջյանը՝ անդրադառնալով դիտարկմանը, որ վարչապետ Նիկոլ Փաշինյանի՝ նախօրեին կայացած ասուլիսի ընթացքում լրագրողների մեծ մասը հնչեցրին անկարևոր հարցեր, որոնք որևէ կապ չունեն այսօրվա խնդիրների ու մարտահրավերների հետ:
«Այսօր Հայաստանում լրագրության դաշտը, մեղմ ասած, վատ վիճակում է. կա կրթական ցենզի, տարրական գրագիտության խնդիր: Եթե լրատվամիջոցները ցածր շեմ են դնում, ապա ի՞նչ ենք պահանջում սովորական քաղաքացուց, պարզ է, որ նա սկսում է դառնալ այդ ցածրակարգ, երբեմն շատ վատ՝ «լվացքատնային» խոսակցությունների շահառուն և կրողը»,- նշեց պատմաբանը՝ հավելելով, որ մամուլը պետք է ունենա կրթող դերակատարում, և այսօր լրջագույն խնդիրներից է մեդիագրագիտության հարցը:
Պատմաբանի դիտարկմամբ՝ մամուլը մեզանում երբեք այնքան ազատություն չի ունեցել (90-ականների սկիզբը չհաշված), որքան հիմա. «Եվ անիմաստ է խոսել մամուլի նկատմամբ ճնշումներից: Իհարկե կան որոշ պաշտոնյաներ, որոնք տղայականությունը և ակտիվիզմը չեն հաղթահարել և փորձում են խմբագիրների և լրագրողների հետ կուլիսային հարաբերություններ պարզել, բայց դա անցողիկ փուլ է, ժամանակի ընթացքում ջահելները բարեկրթվում են ու հասունանում»:
Կարո՞ղ ենք փաստել, որ այս մամուլի ասուլիսով Փաշինյանը փամփուշտներ ավելացրեց իր արսենալում: Եվ ինչո՞ւ Ձեզ համար Փաշինյանը նույնական չէ իշխանության հետ: Ի պատասխան այս հարցերի՝ Վ. Թոքմաջյանն ընդգծեց. «Փաշինյանը պետք է ընտրություն կատարի իր իշխանության որոշ ադամների և պետության միջև: Հեղափոխությունն ունի որոշակի տրամաբանություն, հեղափոխության դինամիկան ենթադրում է նաև կադրերի ջարդ: Երբ որ անդրադառնում ենք պետության կառավարման խնդրին, պետք է հստակ տարանջատենք մեր քաղաքական թիմը և պետությունը, և եթե քաղաքական թիմի որոշ անդամներ կոմպետենտ չեն իրենց զբաղեցրած դիրքին, ապա պետք է շատ արագ ազատվել նրանցից»:
Մանրամասն՝ տեսանյութում:
