Երեկ Ազգային ժողովի պետաիրավական հարցերի հանձնաժողովում վերջապես քննարկվեց Միասնական քննչական կոմիտեի մասին օրինագծը: Քննարկումն աշխատանքային էր, և պատգամավորները ներկայացնում էին յուրաքանչյուր հոդվածի վերաբերյալ իրենց դիտողությունները: Օրինագիծը ներկայացնում էր և հարցերին պատասխանում էր արդարադատության նախարար Հրայր Թովմասյանը:
Հիշեցնենք, որ անցած տարի սեպտեմբերին Սերժ Սարգսյանն այս կոմիտեն ստեղծելու կարգադրություն ստորագրեց: Այն հետևեց նախկին գլխավոր դատախազ Աղվան Հովսեփյանի պաշտոնավարման ժամկետի ավարտին: Կարգադրության մեջ նշված էր, որ նա նշանակվում է այդ քննչական կոմիտեի կազմավորման իրավական ապահովման հանձնաժողովի նախագահ: Այդպիսով հասկանալի դարձավ, որ Ա. Հովսեփյանը նշանակվելու է կազմավորվելիք Քննչական կոմիտեի ղեկավար: Եվ ահա, այս ամիսներին այդ հանձնաժողովը` Ա. Հովսեփյանի գլխավորությամբ մշակել է կոմիտեի ստեղծման մասին օրինագիծն ու ներկայացրել ԱԺ: Հավանաբար հենց այդ պատճառով էլ ՀԱԿ խմբակցության անդամ Գագիկ Ջհանգիրյանը քննարկման ժամանակ հայտարարեց, թե «գրողը՝ նախկին գլխավոր դատախազը, դատախազության մասին օրենք է գրել»: Եվ ընդհանրապես, երեկվա քննարկման ժամանակ հարցերն ու դիտողությունները հիմնականում Գ. Ջհանգիրյանն էր հնչեցնում, պատասխանում էր Հ. Թովմասյանը:
ՀԱԿ պատգամավորը հայտարարեց, որ ինքը միշտ կողմնակից է եղել միասնական քննչական մարմնի ստեղծմանը: Սակայն այս դեպքում կոմիտեն այնքան էլ միասնական չէ, քանի որ ներառում է միայն Պաշտպանության նախարարության և Ոստիկանության քննչական ծառայությունները: Եվ եթե նախկինում կային հինգ՝ Ոստիկանության, ՊՆ-ի, ԱԱԾ-ի, Պետեկամուտների կոմիտեի քննչական ծառայություններն ու Հատուկ քննչական ծառայությունը, ապա հիմա առաջին երկուսի միավորումով դառնում են չորսը, և դա այնքան էլ չի լուծում միասնական քննչական մարմնի ստեղծումը: «Ուզում եմ հասկանալ, թե ինչու ենք ընտրել, իմ կարծիքով, ամենավատ միացվողները` ՊՆ քննչականն ու Ոստիկանության քննչականը: Դրանից մենք մեծ բարդություններ ենք ունենալու»,- հարցրեց Գ. Ջհանգիրյանը:
Հիշեցնենք, որ նախապես որոշված էր, որ ՊՆ-ի և Ոստիկանության քննչական ծառայությունների հետ միասին այս մարմնում ընդգրկված է լինելու նաև ՊԵԿ-ի քննչական բաժինը: Այդպես նշված էր նաև այդ կոմիտեի ստեղծման մասին Ս. Սարգսյանի կարգադրության մեջ, սակայն ավելի ուշ որոշվել է, որ ՊԵԿ-ի քննչականն առայժմ չի միանալու այդ մարմնին: Կարծիք կա, որ ՊԵԿ նախագահ Գագիկ Խաչատրյանը չի ցանկացել, որ Ա. Հովսեփյանի ղեկավարած մարմինը քննի իր համակարգման տակ գտնվող ոլորտի հետ կապված գործերը և կարողացել է առայժմ զերծ մնալ դրանից: Հ. Թովմասյանն էլ երեկ նիստի ժամանակ հայտարարեց, որ Ոստիկանության և ՊՆ քննչական մարմիններին է պատկանում քննվող գործերի մոտ 95 տոկոսը, այնպես որ` առայժմ նպատակահարմար է համարվել այդ երկու գերատեսչությունների քննչական կառույցները միավորել: Իսկ կոմիտեի ստեղծման և կազմավորման դեպքում ի նկատի են ունեցել ԱՊՀ երկրների փորձը: «Իհարկե, ես հասկանում եմ, որ քրեական գործերի մեծ մասը այս երկու մարմիններն են քննում, բայց դա արգումենտ չէ»,- հակադարձեց Գ. Ջհանգիրյանը:
Պատգամավորը օրինագծի հետ կապված այլ դիտողություններ ևս ներկայացրեց, որոնք կապված էին կոմիտեի կառուցվածքի, պաշտոնյաների պարտականությունների և կադրային խնդիրների հետ: Գ. Ջհանգիրյանին մտահոգում էր նաև մի հարց, որ այդ օրինագիծը չի պաշտպանում քննիչների ինքնուրույնությունը: «Եվ դա մեր քրդատօրենսգրքի հերն անիծելու է»,- հայտարարեց Գ. Ջհանգիրյանը:
Նրա խոսքերով` Քրեական դատավարության օրենսգրքի համաձայն քննիչը գործերի հետ կապված դժգոհություն ունենալու դեպքում կարող էր դիմել հսկիչ դատախազին, մինչդեռ այս դեպքում զեկուցելու է անմիջապես կոմիտեի նախագահին, ինչը սահմանափակում է նրա ինքնուրույնությունը: Իսկ օրինագիծն այս հանձնաժողովում մեկ անգամ ևս կքննարկվի հաջորդ շաբաթ, և չի բացառվում, որ այն ներկայացվի արդեն լրամշակված տարբերակով, հանձնաժողովում դրական եզրակացություն ստանա ու ընդգրկվի լիագումար նիստերի օրակարգ:
Լուսանկարը՝ Photolure-ի
