Կահիրեի Թահրիր հրապարակում նախօրեին տեղի ունեցած բախումների ժամանակ վիրավորվել է ավելի քան 1000 մարդ, այդ թվում՝ հատուկ ծառայությունների ներկայացուցիչներ: Այս մասին Reuters գործակալությանը հաղորդել են Եգիպտոսի առողջապահության նախարարությունում:
Վերջին տեղեկություններով՝ այդ թիվը հասնում է 1036-ի, որոնցից 40-ը ոստիկաններ են: Երեկվանից Թահրիրն ամբողջությամբ փակված էր, քանի որ ցուցարարները ցանկանում էին տեղ զբաղեցնել հեղափոխական այդ վայրում՝ իրենց բողոքի ձայնը տեղ հասցնելու համար: Ցուցարարները հիմնականում հեղափոխության ժամանակ զոհվածների հարազատներն են, որոնք պահանջում են անհապաղ պատասխանատվության ենթարկել մեղավորներին:
Al-Jazeera-ն հաղորդել է, որ ոստիկանությունը բավական կոշտ է գործել: «Ո՛չ զինվորական խունտային» կարգախոսներով ցուցարարները կոտրել են հարակից շենքերի ապակիները, ջարդել մեքենաներ: Հիշեցնենք, որ Մուբարաքի նկատմամբ սպանությունների գործով դատավարությունը սկսվում է օգոստոսի 3-ին:
